Manuel Moreira e Iolanda Veloso subliñan nun acto diante do Hospital Xeral que o Bloque ten que estar en Europa para defender a sanidade pública

Vigo, 12 de maio de 2014.- O candidato 8 do BNG ao Parlamento europeo, Manuel Moreira, e a portavoz municipal, Iolanda Veloso, criticaron o anuncio “histórico” de peche de camas hospitalarias en Vigo para este verán. Segundo denunciaron esta decisións “demostra cal é a aposta do PP” en materia sanitaria.

“Para o BNG é fundamental estar no Parlamento europeo para defender alí a sanidade pública”, destacou Manuel González Moreira, quen dixo tamén que é preciso que o BNG estea “para que se escoite a voz da maioría á que se lle recortan os seus dereitos”.

O candidato nacionalista e portavoz da Plataforma SOS Sanidade Pública sinalou que o PP e o PSOE comparten as mesmas medidas de austeridade “que para o Bloque son de austericidio, e que nos deixan sen postos de traballo e sen servizos públicos”.

González Moreira apuntou que precisamente os servizos sanitarios son, xunto ao ensino, dos máis afectados polos recortes que executa o PP na nosa cidade. “Vigo é exemplo das políticas privatizadoras do PP”, asegurou, en relación a construción do novo hospital por unha empresa privada.

O PP traballa para favorecer os intereses das empresas

Nesta liña, Iolanda Veloso criticou que mentres na cidade temos un hospital público “completamente saturado”, o Sergas anuncia un “peche histórico” de camas no verán, que afectará a 256 das 1.230 que existen en Vigo.

“O BNG leva denunciando a situación hospitalaria de Vigo desde hai moito tempo”, manifestou a portavoz municipal do Bloque ao lembrar as protestas polo peche o ano pasado das camas correspondentes a xinecoloxía. “Pero este ano padeceremos un peche histórico”, criticou.

Salientou que fronte a esta situación “a única solución que se lle ocorre ao PP é construír un hospital privatizado, que custará o triplo que se fose público e que vai tomar decisións sobre a nosa saúde”. Para a voceira nacionalista, estas decisións demostran que o PP “traballa para favorecer os intereses das empresas privadas e non polos pacientes”.

Como exemplo das políticas crueis do Partido Popular, Iolanda Veloso tamén mencionou o problema que sofren os lesionados medulares. “Teñen que trasladarse a Coruña porque o PP négase a abrir unha unidade en Vigo”, denunciou.