O Bloque solicita a colaboración cidadá para localizar e reclamar a retirada dos restos aínda existentes

Vigo, 23 de setembro de 2014.- O Bloque da comarca de Vigo inicia unha campaña que, baixo o lema “Fascismo Nunca Máis”, anima ao conxunto da cidadanía a colaborar na localización de simboloxía fascista aínda existente nos concellos desta comarca. Para o BNG, a existencia de simboloxía fascista é un “insulto á memoria dos galegos e galegas que sufriron o franquismo” e lembra que a Lei de Memoria Histórica obriga a súa retirada.

As persoas que queiran colaborar nesta campaña poden facelo enviando as súas fotos ao enderezo electrónico [email protected], antes do 30 de outubro, indicando a súa localización exacta e as datas de obtención das imaxes. Rematado o prazo de envío, faranse públicas e o BNG procederá a esixir a súa súa retirada.

O BNG critica que case corenta anos despois de rematada a ditadura, e logo de sete anos da entrada en vigor da Lei da Memoria Histórica, aínda hai que aturar nos espazos públicos dos concellos da nosa comarca o mantemento de símbolos franquistas, como nomes de rúas, placas, monumentos conmemorativos e símbolos falanxistas en edificios.

Desinterese do PP e colaboración do PSOE

Para o Bloque, a persistencia desta simboloxía débese “ao desinterese do Partido Popular á hora de dar cumprimento da lei”, tal e como acontece coa placa falanxista existente no Templo Votivo de Panxón, ou a cruz “aos Caidos” do Castro en Vigo. Neste sentido, o BNG denuncia que o PP conta coa colaboración do goberno do PSOE, presidido por Abel Caballero.

“A respecto destes dous monumentos o BNG insiste, a través da súa representación nos concellos de Nigrán e Vigo, en demandar a súa retirada”, subliña o Bloque comarcal, para quen a existencia de simboloxía fascista supón unha ofensa e provoca un sufrimento innecesario ás familias das persoas asasinadas, perseguidas e represaliadas durante a guerra e a ditadura franquista.

Segundo o BNG, a permanencia desta simboloxía constitúe un agravio para todas aquelas persoas que non secundaron a cruel ideoloxía da ditadura. Ademais, “supón un insulto á memoria da xeración de galegas e galegos que sufriron o franquismo por defenderen a liberdade e os dereitos democráticos e nacionais do pobo galego, á memoria daqueles aos que lles arrebataron a vida, torturaron, privaron de liberdade ou sufriron o exilio, para as cales desde o BNG esiximos a súa plena rehabilitación”.

Posto que a Lei da Memoria Histórica obriga a retirar dos espazos públicos todo símbolo ou mención “conmemorativa de exaltación, persoal ou colectiva, da sublevación militar, da Guerra Civil e da represión da ditadura”, para o BNG cómpre levar a cabo as accións precisas para demandar a súa retirada.