O BNG propón ao goberno que faga unha modificación de crédito para non deixar a ningún neno e ningunha nena sen axudas

Vigo, 24 de setembro de 2014.- A portavoz municipal do BNG, Iolanda Veloso, denunciou o colapso nos servizos sociais municipais ao haber máis de 400 nenos e nenas na lista de agarda das bolsas de comedor e libros, segundo se desprende do expediente levado á xunta de goberno local do pasado 19 de setembro fóra da orde do día. Ademais acusou ao goberno local de manter un “escurantismo total” na tramitación destas axudas ao negar o alcalde a existencia da lista de agarda.

Iolanda Veloso subliñou que o BNG sempre defendeu o incremento das axudas para libros e comedores escolares, co obxectivo de responder ás necesidades da cidadanía, e de que esas axudas estivesen resoltas antes do inicio do curso. “Pero un ano máis atopamos que o goberno local non é quen de resolver as axudas a tempo”, criticou, sinalando que desta forma hai pais e nais que coas clases xa comezadas non saben se poderán enviar aos seus fillos e fillas aos comedores escolares.

“O alcalde non é capaz de xestionar as axudas escolares de forma que os nenos e nenas que as solicitan saiban no inicio de curso se teñen as bolsas”, denunciou a voceira municipal do BNG. “Que as clases comezaban o 10 de setembro é algo sabido desde hai meses”, comentou ironicamente.

Escurantismo na tramitación

Segundo denunciou, e tal e como recolle o expediente levado á xunta de goberno,“é absolutamente falso o que di o alcalde, porque hai 405 nenos e nenas en lista de espera para libros e 416 para comedor”, polo acusou de “total escurantismo” na tramitación das axudas. “A realidade non se corresponde co que di o alcalde”, defendeu.

“A nós gustaríanos que fose certo o que di o alcalde, e propoñémoslle que faga unha modificación de crédito, que nós a apoiaríamos. Pero que non siga dicindo que non hai nenos e nenas sen bolsa de comedor”, manifestou.

Falta de recursos

Segundo explicou Iolanda Veloso, o informe do interventor sinala o 12 de agosto como data de remate do prazo para a resolución das axudas, “pero non se resolveron até o 19 de setembro”, apuntou ao tempo que salientou que existe un claro “problema de recursos por falta de vontade política”.

Neste sentido, lembrou que o BNG leva meses denunciando a falta de persoal en servizos sociais, mesmo reclamando un pleno extraordinario no que trate a contratación de máis traballadoras sociais. “Sabemos que hai un grave problema de recurso e que hai un forte esforzo por parte do persoal para atender as necesidades da cidadanía”, subliñou.

Finalmente, Iolanda Veloso expresou a preocupación do Bloque por que na web do Concello se publique o listado cos datos completos dos nenos e nenas así como dos seus proxenitores. “Non podemos valorar se neste caso se cumpre a lei de protección de datos, pero preocúpanos que se publiquen desta forma os datos completos”, manifestou.