Serafín Otero: “Defendemos a transparencia e queremos un concello coas paredes de cristal”

Serafín Otero: “Defendemos a transparencia e queremos un concello coas paredes de cristal”

O candidato nacionalista afirmou que Vigo necesita unha nova forma de facer política que garanta a participación da cidadanía na toma de decisións nos principais temas da cidade

 

acto Calvario webVigo, 16 de maio de 2015.- O candidato do BNG – Asembleas Abertas, Serafín Otero, avogou hoxe no Calvario por un Concello no que os sinais de identidade sexan a transparencia e a participación. Así propuxo a creación dunha ordenanza sobre transparencia e libre acceso á información, ademais dun novo regulamento de participación cidadá e a modificación do regulamento do pleno.

“Defendemos a transparencia e queremos un concello coas paredes de cristal”, subliñou Serafín Otero no acto que celebrou o BNG vigués na zona peonil do Calvario, e no que estivo acompañado por boa parte da candidatura, como as número 2, 4 e 6, Vitoria Iglesias, Ernes Rodríguez e Lola Rodríguez, respectivamente; e tamén polos candidatos 3, 5, 7 e 9, Manuel G. Moreira, Manuel Caride, Diego Santorio e Xabier P. Igrexas.

O candidato do Bloque apostou por aumentar o grao de transparencia na administración municipal co fin de “evitar que o Concello continúe asediado por causas xudiciais e se poña fin ao enchufismo”. “Queremos que o nome de Vigo non se vexa envolto en máis Operacións Patos”, asegurou ao tempo que subliñou a necesidade de “mudar a forma de facer política na cidade”.

Acceso á información

Neste sentido Otero defendeu o acceso da cidadanía á información relativa a todos os expedientes tramitados, para o cal propuxo considerou imprescindible unha a elaboración dunha ordenanza sobre transparencia e libre acceso á información. Segundo destacou “cómpre garantir o carácter público da información” e apostou por crear un plan anual de publicidade e comunicación, que regule os gastos de publicidade e propaganda dos diferentes departamentos municipais.

Para mudar a forma de facer política en Vigo, o candidato nacionalista destacou asemade que hai que “abrir o concello á participación da cidadanía”. Neste sentido criticou que nos últimos anos a veciñanza tivo que padecer un goberno que utilizou o autoritarismo como forma de dirixir a cidade, acalando os movementos sociais.

“Vigo sufre unha forte parálise dos mecanismos de participación cidadá, polo que no BNG queremos crear espazos de poder popular nos que os veciños e veciñas poidan expresar as súas opinións e poidan tomar decisións”, destacou.

Serafín Otero recalcou a necesidade de establecer un novo regulamento de participación cidadá e a modificación do regulamento do pleno “para favorecer o pluralismo e a fiscalización do goberno”. Segundo, este novo regulamento incluirá a obrigatoriedade de consultar á veciñanza e aos colectivos sobre os principais asuntos cidadás.

“Queremos garantir a participación efectiva tanto dos grupos políticos como das asociacións e movementos sociais da cidade, para que todos os asuntos relacionados coa institución sexan accesibles”, afirmou, ao tempo que defendeu a elaboración duns orzamentos participativos, “para que os veciños e veciñas poidamos opinar onde se gastan os nosos cartos”.

 

Serafín Otero: “Defendemos a transparencia e queremos un concello coas paredes de cristal”