O BNG considera que o escándalo do marido da conselleira de Sanidade é un exemplo de como o PP coloca “aos seus como comisarios políticos” na sanidade pública

Vigo, 30 de Xaneiro 2014.- O portavoz nacional, Xavier Vence, advertiu que o Goberno galego aprendeu dos erros do PP en Madrid e do seu intento de “privatización á bruta” da sanidade pública e en Galiza segue outra estratexia: a de adoptar medidas “pinga a pinga e con nocturnidade” de recortes, copagamentos e privatización de servizos do sistema sanitario público.

“O PP en Galiza aplica unha estratexia de privatización de largo alcance, paso a paso, do sistema, porque aprendeu das consecuencias e do fracaso de aplicar unha privatización á bruta como a que pretenderon en Madrid, e aquí Feijóo vai pola vía de facelo de xeito sibilino pero cos mesmos obxectivos”, denunciou Vence.

Apoio á mobilización do 13 de febreiro

O dirixente nacionalista mantivo un encontro coa Plataforma SOS sanidade pública en Vigo, onde se desprazou para amosar o “total apoio” do BNG coa manifestación convocada por esta plataforma e outros colectivos para o vindeiro 13 de febreiro, en defensa dunha sanidade pública “universal e de calidade” para Vigo e a súa área metropolitana.

Vence fixo fincapé na reordenación das áreas sanitarias impostas pola Xunta de xeito unilateral, que prevé a desviación de pacientes da área sanitaria de Vigo. Neste sentido, subliñou que o problema das listas de espera que alega o SERGAS “non se soluciona” obrigando a desprazarse aos doentes, senón dotando de servizos e de especialidades aos centros hospitalarios da maior cidade do país, tal como ben de defender o BNG a través do grupo municipal.

Recortes no novo hospital

“Vemos como o modelo de sanidade privada ensaiado con Povisa queren estendelo ao novo hospital”, advertiu, mentres en paralelo, o que o novo hospital que debería ser a peza clave para borrar as carencias do servizo sanitario en Vigo, “xa está convertido nun hospital semiprivado, con recortes nas dotacións”, pese a que a fórmula público-privada de xestión da Xunta triplicará os custes de construción iniciais.

Unha denuncia na que insistiu a portavoz municipal, Iolanda Veloso, quen cualificou de “especialmente preocupante” a situación da área sanitaria de Vigo, “tanto nos servizos sanitarios existentes no hospital Xeral e no Meixoeiro, ao que agora se suma a derivación de pacientes a outras áreas sanitarias, ademais de que somos a única área que ten poboación asignada a un hospital privado”.

Mosquera, abuso de poder

Vence reiterou a petición do BNG de dimisión da conselleira de Sanidade, Rocio Mosquera, tras a sentenza do TSXG que considera probado que existiu “abuso de poder” na adxudicación dunha praza de xefatura de servizo ao seu marido no CHUS, no momento en que ocupaba a Xerencia do SERGAS.

“Unha decisión que mostra a forma de traballar do PP nos servizos públicos: usa o poder para colocar comisarios políticos na sanidade pública e despois os utiliza para minar e desmantelar a propia sanidade pública desde dentro”, denunciou o portavoz nacional.

“A conselleira debe dimitir porque estamos ante unha sentenza xudicial que, de xeito inapelable, admite unha desviación de poder a favor do seu marido, e Feijóo debe explicar a xestión que fai da sanidade pública para promocionar aos seus de xeito irregular e minar desde dentro á sanidade pública con comisarios políticos do PP”, recalcou.

No encontro coa Plataforma SOS sanidade pública en Vigo tamén participou a deputada no Parlamento galego e portavoz parlamentar de Igualdade e Benestar, Carme Adán, e a deputada no Congreso, Olaia Fernández Davila.