Referentes sociais e culturais da cidade poñen en valor o aniversario do regreso do BNG ao Concello de Vigo

Toma de posesión de Xabier P. Igrexas como concelleiro do BNG.
Toma de posesión de Xabier P. Igrexas como concelleiro do BNG.

A fronte nacionalista celebra un ano da toma de posesión do seu concelleiro, Xabier P. Igrexas, cunha campaña nas redes sociais baixo o lema #EnBloquePorVigo, na que difundirán vídeos de persoas representativas de diferentes sectores nos que valoran o que supuxo o retorno do BNG á Corporación Municipal.

A escritora María Reimóndez, o atleta Victor Currás, o secretario comarcal da CIG Alberto Gonçalves, a filósofa Carme Adán, o histórico sindicalista Manuel Mera ou o activista veciñal Anxo Igrexas, son algunhas das voces que partillarán a súa visión sobre o traballo realizado polo Bloque nos últimos doce meses.

Referentes sociais e culturais da cidade poñen en valor o aniversario do regreso do BNG ao Concello de Vigo

O pasado 15 de xuño cumpríase un ano da sesión plenaria coa que se iniciaba o actual mandato após os comicios municipais do 26 de maio de 2019. Coa toma de posesión de Xabier P. Igrexas como concelleiro, o Bloque Nacionalista Galego recuperaba a presenza institucional no Concello de Vigo, que se vira interrompida nos anteriores catro anos. A fronte nacionalista quixo poñer en valor este feito lanzando unha campaña nas redes sociais na que, baixo o lema #EnBloquePorVigo, difundirán vídeos nos que referentes sociais e culturais da cidade valoran o que supuxo ese regreso e mais o traballo realizado nos últimos doce meses.

“Hai un ano a forza da xente logrou que o BNG regresásemos ao Concello de Vigo. Nestes doce meses, esforzámonos a eito por empurrar, coa complicidade dos movementos sociais, unha alternativa en positivo para darlle a Vigo o novo impulso que necesita. Poñendo os problemas e as necesidades reais da xente no centro. Dando voz a quen outros se negan a escoitar. Desde un compromiso radical coa xustiza social, o feminismo e a ecoloxía. Facendo valer o papel de Vigo como motor do noso País”, resume a xeito de balance o portavoz municipal, Xabier P. Igrexas.

Voces diversas

Esta mañá publicaron o primeiro vídeo, no que a escritora María Reimóndez, subliñou que o retorno do Bloque incorporou unha visión máis plural da cidade e recoñeceu a proximidade do traballo municipal desenvolvido por Igrexas. Aliás, Reimóndez salientou o compromiso do BNG nun ámbito que considera “vital” como é a cuestión ambiental para lograrmos unha cidade máis habitábel.

A partir de hoxe iranse publicando, nos perfís do BNG local nas redes sociais, preto dunha vintena de vídeos coas valoracións de referentes culturais, como a filósofa Carme Adán, pero tamén de activistas de diferentes movementos sociais, do campo sindical –como o secretario comarcal da CIG, Alberto Gonçalves, ou o histórico Manuel Mera–. Tamén tomarán a palabra xente moza, estudantado universitario, activistas veciñais –como Anxo Igrexas da AV de Teis, ou deportistas –como o atleta e xornalista Victor Currás–. Referentes locais do Bloque, como son o actual responsábel local, Serafín Otero, o exalcalde Lois P. Castrillo, e a exdeputada no Congreso, Olaia Fdrez. Davila, tamén quixeron valorizar a traxectoria do BNG neste último ano.

“Un ano é tempo abondo para facermos un primeiro balanzo. Pero para facelo quixemos preguntarlle a persoas referenciais da cidade, da organización e, sobre todo de fóra dela. Persoas do ámbito cultural, dos movementos sociais, da loita sindical, do feminismo. Persoas mozas e outras que conservan a memoria viva das loitas históricas que cicelaron a nosa cidade”, explican desde a fronte nacionalista.

Referentes sociais e culturais da cidade poñen en valor o aniversario do regreso do BNG ao Concello de Vigo