O concelleiro do BNG, Santi Domínguez, rexeitou o mantemento das subvencións ao voo a Londres e asegurou que a política aeroportuaria “non pode ser froito do capricho de ninguén”. En resposta aos medios subliñou que os malos datos do aeroporto de Peinador responden pola contra á falta de planificación que o alcalde e a Xunta non son quen de levar adiante.

A respecto do voo a Londres, Santi Domínguez salientou que se trata dunha liña de baixo custe “non consolidada”, tal e como o demostra que a media de ocupación no último ano fora unicamente do 56%. “Cando nun ano ou dous unha liña non funciona, o goberno municipal non pode seguir poñendo cartos enriba da mesa para que unha empresa obteña beneficios”, apuntou ao respecto.

Pola contra, o nacionalista defendeu que, tal e como xa ten manifestado a portavoz municipal, os cartos da subvención deben ser destinados a emprego e servizos sociais. “A eliminación desta subvención foi unha das nosas condicións para aprobar os orzamentos, e xa dixemos que as nosas emendas son innegociables”, asegurou.

Complementariedade dos aeroportos

Santi Domínguez afirmou que “a única vez” que no Concello de Vigo houbo planificación a respecto da política aeroportuaria foi cando o BNG tivo competencias en materia de turismo. Lembrou que nese momento se presentou un “plan consensuado” con A Coruña, Santiago e Vigo para os tres aeroportos galegos “que puxemos a disposición da Xunta”.

Segundo explicou, nese plan fomentábase a complementariedade dos tres aeroportos e para Vigo contemplaba impulsar as conexións xa existentes con Madrid, Barcelona e París., e iniciar e consolidar enlaces co sur da Península e Centroeuropa. “Pero ese plan quedou en nada porque a Xunta do PP o meteu nun caixón” e o goberno galego creou o comité de rutas cos alcaldes á cabeza. “A vista está que ese comité non serviu para nada”, asegurou.

Pola contra, para o BNG “a solución de Peinador non pode pasar por seguir subvencionando a unha empresa privada”. Segundo Santi Domínguez, o futuro pasa “necesariamente” por buscar a complementariedade dos tres aeroportos. “Non é de recibo seguir asistindo as liortas entre os tres alcaldes mentres o aeroporto de Porto si fai a súa planificación”, comentou.