O BNG de Vigo pide un maior apoio de Xunta e Goberno español para potenciar o aeroporto de Peinador

O aeroporto de Peinador tras a súa última remodelación
O aeroporto de Peinador tras a súa última remodelación

O candidato do BNG á alcaldía, Xabier P. Igrexas, demanda a mellora da accesibilidade da terminal e a posta en marcha dun Plan de dinamización con recursos dos gobernos galego e español.

“O futuro de Peinador pasa por articular un sistema aeroportuario galego, integrado e coordinado, para consolidar e reforzar a actual oferta de destinos e frecuencias”, defende Pérez Igrexas.

O BNG de Vigo pide un maior apoio de Xunta e Goberno español para potenciar o aeroporto de Peinador

A marcha de Ryanair da cidade de Vigo volveu reabrir o debate o futuro do aeroporto de Peinador. Nese contexto, desde o BNG apostan por planificar o futuro da terminal viguesa “con luces longas” facendo que non dependa de “decisións arbitrarias dunha aeroliña”. Nese sentido, o candidato do BNG á alcaldía de Vigo, Xabier P. Igrexas, demanda que tanto goberno galego como do estado aposten polo aeroporto vigués e acheguen os recursos necesarios para desenvolver as súas potencialidades tanto no tránsito de viaxeiros e viaxeiras como tamén no transporte de mercadorías.

Para o BNG ten que haber un apoio real e efectivo de ambas as dúas administracións pois a terminal, enclavada na principal cidade galega é importantísima tanto en termos loxísticos como estratéxicos na eurorrexión Galiza-Norte de Portugal. “Peinador é moito máis que o aeroporto de Vigo e da súa área metropolitana”, reivindica Igrexas. Emporiso, o candidato nacionalista demanda a posta en marcha dun Plano de Dinamización do Aeroporto de Peinador, no que se implique tanto o goberno galego como o español. Unha planificación que evite que Peinador estea sometido ás dinámicas conxunturais de aeroliñas e que permita consolidar e alargar a oferta de vóos, con máis itinerarios e frecuencias. “O futuro de Peinador non pode depender de decisións máis ou menos caprichosas e arbitrarias dunha aeroliña. Xunta e Goberno español teñen que apostar de verdade polo aeroporto de Vigo”, enfatiza.

Accesibilidade 

A formación nacionalista demanda tamén que se acometan melloras na accesibilidade e conectividade da terminal aeroportuaria. Para iso volven demandar a necesidade dun enlace directo que conecte Peinador coa AP9, por ser a principal infraestrutura viaria que atravesa a cidade, dado que o actual vial de conexión é insuficiente e cun trazado pouco operativo. Esta cuestión foi unha das reclamacións formuladas polo Bloque á proposta de Orzamentos Xerais do Estado para este 2019.

Tamén insisten en que ten que haber unha liña de autobús regular e directa que comunique o aeroporto coa cidade e singularmente coas dúas estacións de tren e a terminal de autobuses. “Non ten ningún sentido que a única liña de autobús urbano ao aeroporto sexa a 9A. Un aeroporto como Peinador merece unha liña directa como teñen outras cidades galegas”, demanda o candidato do Bloque. Igrexas lembra que as emendas nacionalistas ao proxecto de orzamentos da Xunta para este 2019 reclamaban unha partida de 300 mil euros para esta finalidade, que foi rexeitada polo Partido Popular.

De cara a impulsar as “potencialdiades hoxe practicamente desaproveitadas” en relación ao transporte de mercadorías, propoñen dotar a Peinador dunha área loxística nas súas inmediacións.

Cooperación a nivel galego

O candidato nacionalista volveu insistir na necesidade dunha planificación aeroportuaria en chave galega. “O futuro de Peinador pasa por superar esa visión reducionista que entende que os aeroportos galegos teñen que competir entre si, cando o noso verdadeiro competidor é o Sá Carneiro”, defende Pérez Igrexas. Nesa liña, reiterou a posición do BNG a prol de artellar un “sistema aeroportuario galego” que “desde a cooperación, tecendo sinerxías e complementando as potencialidades de cada terminal a través da súa especialización, permita mellorar a oferta aeroportuaria en chave de País”.