Imprimir

Xabier P. Igrexas: “O BNG volvemos ao Concello de Vigo para quedar”

BNG Vigo | 27 de maio de 2019

Xabier P. Igrexas celebra os resultados fundíndose  nun abrazo con Serafín Otero
Xabier P. Igrexas celebra os resultados fundíndose nun abrazo con Serafín Otero

O candidato do BNG á alcaldía de Vigo, Xabier P. Igrexas, agradeceu o apoio das case 8500 viguesas e vigueses que apoiaron o BNG e permitiron o seu regreso á Corporación Municipal obtendo un asento no Pleno.

Igrexas recoñeceu a “clara vitoria” do PSOE, pero advirte que “ningunha maioría absoluta, por folgada que sexa, é un cheque en branco para gobernar de costas ou en contra da veciñanza”. O BNG celebra “o desplome do PP de Feixóo” en Vigo e que forzas “españolistas ultra e reaccionarias” como Vox e Ciudadanos non obtiveran representación.

“O asento do BNG no pleno vai ser tamén o asento que dea voz ao tecido asociativo e de todas as viguesas que cren que a cidade merece máis. Centrarémonos en ofrecer alternativas en positivo para responder ás necesidades reais das viguesas e vigueses, dos barrios e parroquias”, anticipou Igrexas.

“O BNG retornamos ao Concello de Vigo e volvemos para quedar”, con estas palabras empezou a súa intervención valorando os resultados electorais deste 26 de maio o candidato do Bloque, Xabier P. Igrexas, que foi recibido cunha ovación na sede da formación nacionalista. Igrexas, que compareceu acompañado do responsábel local e de integrantes da candidaturas, quixo agradecer o apoio das “8.461 persoas que votaron BNG e permitiron o regreso do nacionalismo á principal cidade de Galiza” e puxo en valor que o Bloque sexa “a única forza alternativa ao actual goberno que sube en apoio social”.

O concelleiro electo quixo dedicar as súas primeiras palabras para agradecer o “enorme traballo despregado pola nosa militancia nunha campaña heroica que foi posíbel pola súa entrega incombustíbel e o seu compromiso”. “Sodes o mellor do BNG” dedicoulles entre aplausos. Tamén quixo recoñecer de maneira explícita a labor do anterior candidato e actual responsábel local, Serafín Otero. “O noso regreso non é só resultado dunha campaña, senón tamén do traballo continuado, a pé de rúa, en permanente contacto co tecido asociativo que despregamos nos últimos catro anos e que lle debe moito, moitísimo, ao compañeiro Serafín”.

Sobre o papel que quere xogar a fronte nacionalista, Igrexas explicou que se centrarán “en achegar propostas en positivo, para colocar a política municipal ao servizo da veciñanza e dos barrios e parroquias”. Neste sentido, lamentou que se teñan rebaixado as expectativas que as viguesas e vigueses teñen do Concello, e volveu insistir en que se ten que ofrecer moito máis que “dinoseto, luces de nadal ou obras na superficie con moita propaganda”. O propósito do Bloque será, tal e como insistiron durante toda a campaña, dar resposta aos problemas e necesidades reais da cidade.

Moito máis que un concelleiro do BNG

“Esta acta é moito máis que un concelleiro do BNG. O noso asento no Pleno vai ser o asento de todo o tecido asociativo, para darlle voz fronte a un goberno que con tics autoritarios tentou afogalo nos últimos catro anos. Vai ser un asento para dar voz e voto a todas as viguesas e vigueses que cren Vigo merece moito máis que o que se lle está a ofrecer”, defendeu. Igrexas deixou claro tamén que o obxectivo do BNG é traballar arreo durante os próximos 4 anos para sumar máis apoio social a un proxecto en positivo e de futuro, que “é o que Vigo necesita”.

Valoración resultados

O futuro representante do BNG no Pleno vigués, valorizou tamén os resultados obtidos por outras forzas políticas. Igrexas principiou por “recoñecer a clara vitoria do PSOE”, pero advertindo que “ningunha maioría absoluta por folgada que sexa é un cheque en branco para gobernar de costas ou en contra da veciñanza”. A este respeito, o BNG despregará unha posición "construtiva pero tamén firme e exixente para recuperar a democracia a nivel municipal con máis participación”. “O Goberno municipal que saia destas eleccións ten que entender que construír a cidade é tarefa de todos e todas, non só dun partido”, remachou.

Igrexas celebrou tamén o “desplome” do Partido Popular. “Alégranos ver como o PP de Feixóo, o do hospital privatizado, o que nega o centro de saúde á vila de Bouzas ou o instituto de Navia, foi censurado polas viguesas e os vigueses”. Un retroceso que para o nacionalista anticipa o desenlace das próximas eleccións autonómicas. “Estou seguro de que as viguesas e os vigueses empurraremos un cambio de goberno para acabar con esta Xunta nefasta que condenou ao abandono á principal cidade de Galiza”, acrecentou.

 

Ademais, o BNG cualificou de unha “moi boa nova” que forzas “españolistas da dereita máis ultra e reaccionaria”, como Ciudadanos e Vox non obtivesen representación na cidade olívica.

 

Podes ver este artigo na próxima dirección /articulo/vigo/xabier-p-igrexas-bng-volvemos-ao-concello-vigo-quedar/20190527122333004132.html


© 2019 Bloque Nacionalista Galego de Vigo

Bloque Nacionalista Galego de Vigo

Rúa Celso Emilio Ferreiro 3, baixo
36203, Vigo (GALIZA)
Teléfono: 986447300
Correo: vigo.cidade@bng.gal 

facebook twitter youtube whatsapp telegram instagram flickr