Iolanda Veloso critica que do cheque para os manuais que emite a consellería de Educación queden excluídos os nenos e nenas con necesidades educativas especiais

Vigo, 4 de setembro de 2014.- O BNG acadou o apoio do PSOE para aprobar a moción que reclama que a Xunta volte ao sistema de préstamo universal dos libros de texto e se avance na gratuidade de todos os medios que se utilicen no ensino público. “O ensino debe ter carácter gratuíto para garantir o acceso á educación pública de todos os nenos e nenas”, subliñou Iolanda Veloso.

A voceira nacionalista cualificou de “alucinante” que o PP utilice o argumento da xustiza social para defender o sistema actual. “Quen máis ten é quen máis impostos ten que pagar”, afirmou, ao tempo que recordou que o cheque para libros de texto que actualmente emite a Xunta está asociada a unha listaxe pechada, “de forma que exclúe aos nenos e nenas con necesidades educativas especiais, ás que ademais se lles recortan as axudas”.

“Se isto é xustiza social alguén terá que explicalo”, manifestou Iolanda Veloso, quen asemade recriminou ao concelleiro popular que do que fala “non se corresponde á situación real que se vive nos centros escolares públicos”. Así, advertiu de que o recorte do 40% do programa de financiamento de libros de texto e material no ensino obrigatorio respecto ao ano anterior pode provocar que unha parte do alumnado non poida acceder aos manuais necesarios para seguir as clases con normalidade.

“O PP discrimina por ser nenos ou nenas, discrimina por relixión e discrimina por capacidade”, acusou a portavoz municipal do BNG. Fronte a esta situación, o BNG pide na súa proposta que se doten os centros de persoal abondo para xestionar axeitadamente o sistema de préstamo e que non se cambien os libros de texto para o vindeiro curso escolar naqueles cursos en que se vai implantar a LOMCE.

Pregunta Citroën

En referencia á moción do BNG aprobada no pasado pleno do mes de xullo demandando que o alcalde medien para acadar a readmisión por Citroën dos dous traballadores despedidos, o concelleiro Xabier Alonso preguntou ao rexedor polas xestións que ten feito. Ao respecto, o concelleiro socialista Carlos López Font contestou que están agardando a que se produza a unidade sindical para comezar a mediación.