O BNG denuncia pintadas fascistas e de exaltación do nazismo no lugar da memoria do monte do Castro
A fronte nacionalista demanda o Goberno de Abel Caballero que proceda de inmediato á retirada desas inscricións que atentan contra a memoria democrática
Xabier P. Igrexas: “Hai que avanzar na completa eliminación de todos os símbolos franquistas e fascistas de Vigo, a principiar pola retirada da Cruz dos Caídos no Castro”
O Bloque Nacionalista Galego denuncia a aparición de pintadas fascistas e de exaltación do nazismo no lugar da memoria e outros espazos do monte do Castro. A fronte nacionalista vén de demandar o Goberno de Abel Caballero que proceda de inmediato á retirada desas inscricións que atentan contra a memoria democrática nun espazo que lembra o fusilamento de 136 persoas a mans do réxime franquista.
“Esta acción é un síntoma máis do avance do discurso do odio que empurra a dereita reaccionaria e ultraespañolista, e que debe ser confrontado con toda a firmeza por parte das institucións democráticas”, defendeu o portavoz municipal do BNG de Vigo, Xabier P. Igrexas, subliñando que “a memoria é o soporte da nosa identidade, a que permite sermos o que somos colectivamente”.
“A recuperación da memoria democrática e dignificación da loita antifascista son tarefas fundamentais para evitarmos a ameaza destrutora e deshumanizadora da amnesia”, reivindicou Igrexas, quen puxo en valor os avances en materia de memoria histórica na cidade por impulso do BNG desde o Goberno municipal, coa retirada do escudo franquista da Casa das Artes ou a instalación da Fiestra á Liberdade no Calvario, entre outras.
Retirar a Cruz dos Caídos do Castro
Nesa liña, o portavoz nacionalista chamou a redobrar esforzos para a completa eliminación de toda a simboloxía franquista e fascista que continúa presente en diferentes puntos de Vigo. “A principiar pola retirada da Cruz dos Caídos, inaugurada polo propio ditador na daquela denominada praza da División Azul que colaborou co nazismo, e que incomprensíbelmente segue presidindo de maneira indigna o monte do Castro”, esixiu.
