“Facemos un chamamento a todas as viguesas e vigueses a participaren das actividades da Semana da Patria, a todas e todos aqueles que queren tamén expresar a forza imparábel do BNG na nosa cidade”, afirmou a responsábel local e deputada no Parlamento galego, Carmela González, destacando os “históricos avances” nos últimos procesos electorais como ser primeira forza política en Vigo nas pasadas galegas.

González avanzou unha ampla programación da Semana da Patria Galega, organizada polo BNG e a organización xuvenil Galiza Nova, con actos culturais, palestras, proxeccións, actos lúdicos, accións simbólicas e tamén unha importante presenza de rúa con carpas informativas en diferentes puntos da cidade. “Todo co obxectivo de celebrarmos na maior cidade de Galiza o orgullo de sermos galegas e galegos e de poñer en valor potencialidades que ten o noso País e para afirmar a nosa vocación de facermos de Vigo o verdadeiro motor dunha nova Galiza”, salientou.

A responsábel local das nacionalistas en Vigo asegurou que a Semana da Patria é unha “man tendida” para todas as viguesas e vigueses que acreditan na necesidade dun cambio de rumbo para Vigo e Galiza. “Para todas e todos eles están abertas as portas do proxecto en positivo do BNG, un proxecto coa cabeza e o corazón no País”, manifestou.

González reivindicou un novo marco político que permita á nación galega adoptar medidas en favor da maioría social fronte ás “políticas fracasadas que empequenecen e están deixando atrás Galiza”, apostando polo dereito a vivir con dignidade dun traballo na propia terra que pasa, a xuízo do Bloque, por avanzar na plena capacidade de decisión.

“Temos recursos, temos talento e somos un pobo traballador que queremos producir aquí”, defendeu a responsábel local do BNG.  “Fronte aos que non teñen nada que ofrecer e sementan resignación, a Semana da Patria Galega en Vigo quere ser un espazo para esperanza, na confianza de que temos todo por gañar e que coa forza de todas e todos faremos posíbel o cambio que é necesario desde Vigo para Galiza”, remachou.



PROGRAMACIÓN DA SEMANA DA PATRIA EN VIGO 2024

MARTES 16

20:00h. Presentación do libro AUTOGOBERNO E SISTEMAS DE FINANCIAMENTO. O PAPEL DA NACIÓN GALEGA de Xosé Díaz Díaz. Libraria Cartabón (Urzáiz 125). Presenta: Xabier P. Igrexas.

MÉRCORES 17

12:00h. Carpa de reparto de bandeiras na Praza do Emigrante.

XOVES 18

19:00h. Xornada-debate de Galiza Nova sobre “Problemática nacional e colonialismo”.  CS A Revolta (r/ Real 12).

VENRES 19

11:00h. Carpa de reparto de bandeiras diante do Mercado do Calvario.

19:30h. Pasarúas-reparto en Baiona. Saída: Praza da Palma.

20:00h. Acto público comarcal en Baiona. Paseo da Praia da Ribeira. (á altura da entrada do Parador). Falarán: Iago Pereira, Iria Custodio, Manuel Caride e Lucía López. Convivio ao remate do acto.

SÁBADO 20

12:30h. Despregue bandeira no alto do Monte Alba.

14:00h. Xantar polo Día da Patria. Restaurante Sanatorio do Alba.

LUNS 22

20:00h. Acto de Galiza Nova “A figura de Luisa Villalta como nacionalista alén de escritora”. Libraría Cartabón. Falará: Marta Dacosta.

MARTES 23

20:00h. Proxección-coloquio documental “Altri: a sede insostible”. Local da Asociación Évame-Oroza (Rúa Subida Costa 5- Casco Vello Alto)

MÉRCORES 24

12:00h. Carpa de reparto de bandeiras diante do MARCO.