O Bloque Nacionalista Galego rexeita o aumento do gasto militar e denuncia o “silencio cómplice” ante o xenocidio na Palestina. Así o manifestaron este martes nun acto celebrado en Vigo, baixo o título ‘Galiza contra as guerras do Imperialismo’, o deputado do BNG no Congreso, Néstor Rego, e o portavoz municipal, Xabier P. Igrexas, no que alertaron sobre a perigosa escalada militarista do Estado español e da Unión Europea (UE) en lugar de apostar decididamente pola paz.

No acto enmarcado na programación nacionalista pola VIII Semana da Patria Galega en Vigo, Rego sinalou o rexeitamento da organización nacionalista ao incremento do gasto militar até o 5% por considerar “inxustificábel” destinar recursos a armamento no canto de atender as necesidades reais sociais. “Esta lóxica só atende á lóxica imperialista dos Estados Unidos de América (EUA), que busca manter a súa hexemonía global mediante a guerra e que, de levarse a cabo, o Estado español e todos os socios da OTAN estarían colaborando nunha perigosa estratexia militarista”, advertiu.

Para o deputado nacionalista, o “papel submiso e o silencio cómplice” da UE ante o xenocidio que está levando a cabo o Estado sionista de Israel contra o pobo palestino “é un claro exemplo desta aposta militarista e de alimentar a espiral da confrontación”. O BNG, sinalou Rego, non calará ante o masacre televisado que se está a producir: “Israel non só é unha ameaza, Israel é inimigo da humanidade”.

Rego afirmou a ese respecto que a única forma posíbel de parar este xenocidio é apostar polo desarmamento, o diálogo e unha política internacional verdadeiramente de paz. Do mesmo xeito, demandou que a Comunidade Internacional leve Netayanhu e toda a cúpula sionista ante o Corte Penal Internacional polo xenocidio e os crimes de lesa humanidade que están a cometer.

Saída e disolución da OTAN

Ante esta situación, o deputado nacionalista chamou a rexeitar o aumento do gasto militar proposto pola OTAN e asinado polo Goberno do Estado na última cimeira da organización transatlántica para non detraer máis recursos de servizos como a sanidade, a educación, a vivenda, as pensións.

“O Estado español non pode seguir a actuar como un vasalo da OTAN e dos EUA. Debe recuperar unha política exterior soberana, baseada no respecto ao dereito internacional e nos intereses da maioría social”, asegurou Rego, reclamando máis unha vez a saída do Estado español da organización transatlántica e a súa disolución. “Frear o aumento do gasto militar, retirar o apoio á OTAN e comezar un proceso de desmilitarización que permita destinar os recursos públicos a fortalecer os servizos sociais e garantir os dereitos básicos da poboación”, defendeu Rego.

Pacifismo e antiimperialismo

De por parte, o portavoz municipal do BNG de Vigo, Xabier P. Igrexas, reivindicou o “compromiso coherente do nacionalismo galego en favor da paz e dunha orde internacional baseada na xustiza, no diálogo multilateral e no respeito á soberanía”.

“Diante do silencio cómplice doutros e mesmo o apoio desquiciado dalgúns, o BNG sempre dixemos non á guerra e a todas as agresións imperialistas, for na Iugoslavia, no Iraq, no Afganistán, na Libia, na Siria ou na Palestina”, recalcou.

Igrexas subliñou a concepción “radicalmente antiimperialista” do pensamento de Castelao, no seu 75 cabodano, e a aposta de quen definiu como “Pai da Patria Galega en prol dunha paz construída sobre a base da xustiza”. “A guerra é sempre un instrumento de destrución ao servizo dos intereses dos poderosos”, remarcou o voceiro municipal do BNG, poñendo en valor “a defensa da paz e a oposición ao militarismo e as guerras” por parte dunha “amplísima maioría do pobo galego”.

“Fronte aos señores da guerra do Imperio que queren seguir alimentando a súa industria da guerra, sementado morte e destrución, as e os nacionalistas galegos dicimos que a paz é o único camiño e que só podemos percorrelo desde a solidariedade internacionalista e o respecto á soberanía de todos os pobos do mundo”, proclamou.