O Bloque Nacionalista Galego reclama un esforzo “récord” en política social fronte ao tesoirazo do goberno de Abel Caballero para 2023. A fronte nacionalista considera “indecente” que o Goberno local recorte as axudas sociais até un 22% pese o agravamento da pobreza, polo que reclama nas emendas ao proxecto de orzamentos municipais converter nunha prioridade o combate da crise e os seus graves efectos sobre a maioría de fogares da cidade.

“Cun presuposto récord do que presume Caballero, o BNG cremos que hai que facer un esforzo tamén récord para facer do Concello un verdadeiro parapeto social contra a crise”, defendeu o concelleiro e candidato do BNG á alcaldía de Vigo, Xabier P. Igrexas, que acusou ao alcalde de ocultar con “mentiras e falsidades” o recorte das políticas sociais na súa proposta de contas para o vindeiro ano.

Igrexas afeou que o Goberno municipal pretenda destinar máis recursos a anuncios institucionais que a axudas sociais, que pasan no proxecto de orzamentos do PSOE dos 1,5 millóns de euros actuais a apenas 1,1 millóns. “Un tesoirazo antisocial cando en Vigo hai 60 mil persoas en risco de exclusión e pobreza, máis de 20 mil no desemprego, con filas da fame e centos de familias tendo que acudir a comedores sociais ou organizacións asistenciais para garantir a súa alimentación”, denunciou.

Duplicar as axudas sociais

O candidato nacionalista expuxo unha ampla batería de emendas aos orzamentos municipais como as alternativas do BNG para “rectificar a visión antisocial” do goberno de Caballero. Así, propuxo duplicar os fondos para axudas sociais, elevar a partida de becas de libros e comedor até 1,5 millóns, ampliar os recursos e as persoas beneficiarias do Programa Xantar na Casa e un novo bono que faga gratuíto o bus urbano para persoas desempregadas de longa duración e perceptoras do Ingreso Mínimo Vital.

Solucións ao problema da vivenda

Sobre a vivenda, unha das principais preocupacións e problemas na cidade, reiterou a demanda de crear unha Axencia Local de Vivenda Protexida e Social, como primeiro paso para que Vigo conte cun parque público de vivendas, e despregar un Plan municipal de axuda ao alugueiro, que facilite o acceso diante das crecentes dificultades que atravesan moitas viguesas e vigueses polo aumento dos alugueiros nun 40% nos últimos cinco anos.

Máis recursos para emprego e comercio

Igrexas chamou tamén a redobrar esforzos en materia de emprego e recuperación económica. Desde a fronte nacionalista piden un aumento dun 150% no Plan Municipal de Emprego para destinar un total de 3 millóns de euros, así como dotar con 150 mil euros o Plan de Emprego Xuvenil. Con respecto ao comercio local e de proximidade, lembrou que Vigo é a única cidade galega que non dedicou nin un só euro desde o inicio da pandemia, polo que reivindicou a necesidade dun Plan integral de Impulso do Comercio.