As graves irregularidades denunciadas no mercado de nadal da Praza de Compostela serán abordadas no vindeiro Pleno, convocado para este luns 23 de decembro. O concelleiro do Bloque Nacionalista Galego, Xabier P. Igrexas, presentou unha moción de urxencia, ao abeiro do previsto no artigo 63.4 do Regulamento Orgánico do Pleno, após se coñecer publicamente o pasado xoves as denuncias presentadas pola Confederación Intersindical Galega (CIG) perante o propio Concello, Sanidade e a Inspección de Traballo. De acordo co denunciado pola CIG a entidade adxudicataria do mercado de nadal instalado na alameda estaría a incumprir as bases de adxudicación aí como a normativa de aplicación. No concreto apuntan á falla de garantías hixiénico sanitarias dos postos gastronómicos, a non publicación das listaxes de prezos e a importantes irregularidades na contratación do persoal.

O alcance da gravidade dos feitos denunciados así como que se trata dunha actividade en vía pública que se desenvolve con autorización municipal motivan para o BNG que o Pleno aborde esta cuestión. “O Goberno municipal terá a oportunidade de explicar se tiña constancia destes feitos e, o que é máis importante, que fixo e que pensa facer para garantir o estrito cumprimento das bases de adxudicación”, explica o portavoz municipal nacionalista.

Igrexas recolle na moción a enumeración dos feitos denunciados pola CIG, entre os que se recollen incumprimentos graves da normativa hixiénico sanitaria como que o persoal careza da acreditación para manipular alimentos, a insuficiencia de luvas, a manipulación de alimentos coas mans ou con utensilios con deficiente limpeza ou a falla de refrixeración na almacenaxe dalgúns produtos cárnicos. “O Concello de Vigo non pode permitir que nun mercado incorporado na súa programación de nadal non haxa completas garantías sanitarias”, esixiu.  

O edil nacionalista cargou tamén contra a opacidade do proceso de adxudicación no que mediou a anulación dunha primeira autorización para logo dar lugar a un presunto “concurso” no que só se habilitaba un día de prazo e cando xa estaban instaladas as atraccións e os postos. Tamén criticou que a adxudicación se formalizase por apenas “un euro” e preguntouse quen vai pagar a factura eléctrica dos postos e atraccións. 

A moción nacionalista urxe a que o Goberno municipal practique as inspeccións e adopte as medidas necesarias para resolver esta situación. Tamén demandan que a concellaría de Comercio informe de maneira detallada no seguinte Pleno das actuacións realizadas e instan a que en próximas bases se inclúan cláusulas que garantan o respeito dos dereitos laborais e sindicais do persoal contratado, directa ou indirectamente, pola entidade ou empresa adxudicataria.