O Bloque Nacionalista Galego critica que Abel Caballero insista no “mesmo deseño fracasado” que colapsou Vigo nas anteriores edicións do Nadal. A fronte nacionalista reacciona así ás declaracións do alcalde que vén de anunciar o plan de tráfico a partir deste sábado do que, advirten, non existe constancia de ningún documento nin tampouco foi publicado na páxina oficial do Concello, malia as reiteradas demandas do Bloque para o redeseño do operativo.

“Polas declaracións de Caballero podemos comprobar que basicamente o Goberno municipal insiste no mesmo deseño fracasado que en anos anteriores non evitou o colapso de tráfico e as situacións de inseguridade que converteron o Nadal nun verdadeiro calvario para a veciñanza da cidade durante moitas semanas”, lamentou o portavoz municipal do BNG de Vigo, Xabier P. Igrexas.

Diante desta “falla de transparencia”, o Bloque vén de solicitar imos solicitar acceso a toda a documentación dese “presunto” plan de tráfico e que se informe se foi convocada unha  Xunta Local de Seguridade para garantir a coordinación do dispositivo de tráfico. Adicionalmente, as nacionalistas anunciaron que na vindeira Comisión Informativa de Seguridade van reiterar a necesidade de adoptar medidas concretas e reais que “eviten que este Nadal de 2024 volva ser un caos colosal”.

Recortes do bus e aparcamentos disuasorios

Sobre as declaracións do alcalde, dende o Bloque afearon que chame a priorizar o uso do autobús urbano cando a única información a día de hoxe anticipa recortes no servizo, coa supresión de 8 paradas e de percorridos. “Caballero pide que se use máis o bus pero ao tempo precariza aínda máis un servizo xa estruturalmente insuficiente, prexudicando gravemente á veciñanza que vive e traballa no centro da cidade”, alertou Igrexas, quen pediu aclarar se van despregarse reforzos e lanzadeiras nas xornadas de maior afluencia.

Na mesma liña, o portavoz municipal nacionalista criticou que o rexedor non falase sobre a instalación de aparcamentos disuasorios, máis alá de pedir que se aparque en Samil. Ou da posibilidade de habilitar, como ten proposto o Bloque, un sistema de preferencia semafórica que facilite o paso de autobuses e de vehículos de emerxencia.

Sobre a mobilidade a pé, tamén recomendada polo alcalde, dende o BNG consideraron “moi preocupante” a falla de medidas para evitar situacións de inseguridade como as vividas en anos anteriores, entre outras, na rúa García Barbón. Nin tampouco para evitar, afeou Igrexas, a “temeridade ilegal” de que persoas voluntarias exerzan funcións de control de tráfico para as que non teñen competencias nin capacidade.

Corredores de emerxencia

“Como vai garantir o Goberno municipal o acceso dos servizos de emerxencia, ambulancias, bombeiros e corpos policiais, ao centro da cidade?”, interpelou tamén o portavoz municipal do Bloque, lembrando que os anunciados corredores de emerxencia se demostraron “claramente ineficaces e insuficientes” en anos anteriores, con escenas como ambulancias dando marcha atrás polo atranco de tráfico nun túnel. Igrexas advertiu que “non podemos aceptar que un ano máis o deseño irracional do Nadal acabe demorando entre 15 e 20 minutos o tempo de resposta diante de situacións de emerxencia que pode ser, literalmente, cuestión de vida ou morte”.

“Estamos a tempo”

O portavoz municipal do BNG apelou á responsabilidade do alcalde e do Goberno local para corrixir estas deficiencias, insistentemente denunciadas polos propios nacionalistas, así como por colectivos veciñais e mesmo por diferentes servizos do Concello de Vigo. “Estamos a tempo de evitar riscos innecesarios e de garantir a mobilidade, a seguridade, a convivencia e o respecto aos dereitos da veciñanza; fagámolo”, remachou Igrexas.