Dende o BNG propoñen constituír un Comité de Emerxencia con técnicos municipais que incorpore ademais persoas expertas do Centro Oceanográfico, da Universidade de Vigo e das organizacións ecoloxistas. As nacionalistas piden contar tamén con representantes da Delegación da Xunta e da Subdelegación do Goberno para coordinar os esforzos.

Nese sentido, o Bloque demanda activar un plan de continxencia municipal que mobilice os recursos materiais e humanos necesarios para a retirada de pellets, diante da dificultade da tarefa, e preparar un dispositivo de voluntariado que coordine o propio Concello, como se fixo durante a marea negra do Prestige.

“Agora non hai escusas, sabemos que o risco existe e temos que prepararnos desde xa”, instou Igrexas, quen advertiu de que “o Concello de Vigo non pode quedar preso deste novo pimpampum estéril entre os Gobernos galego e español, co que uns e outros pretenden escorrer o vulto”. Afeou que ambas administracións “non fixeran” nada dende que tiñan coñecemento do vertido desde o 13 de decembro “deixando sós aos concellos sen medios”.

Mesmo modus operandi que no Prestige

O portavoz municipal do BNG cuestionou que o Goberno de Alfonso Rueda insista no “mesmo modus operandi” que durante a crise do Prestige. “Primeiro ocultan o problema e non actúan nin poñen medios, e agora intentan manipular a situación”, reprochou, quen  tachou de “delirantes” as declaracións da conselleira de Medio Ambiente negando a toxicidade dos microplásticos e dicindo que “hai peixes que poden inxerilos e outros non”.

“A Xunta do Partido Popular volve demostrar unha vez máis a súa incompetencia para poñerse á fronte e liderar unha resposta ante un problema medioambiental tan grave como o que estamos vivindo”, remachou Igrexas.