O BNG esixe a Ángel Rivas que medie para unha solución xusta na folga de Parques e Xardíns ou dimita
![Xabier P. Igrexas, portavoz municipal BNG Vigo](/asset/thumbnail,992,558,center,center/media/bngvigo/images/2024/07/23/2024072314053836988.jpg)
A fronte nacionalista reclama unha rectificación das acusacións falsas realizadas polo concelleiro socialista: “Son o retrato dun goberno tan inútil como fóra da realidade”
Acusa ao Goberno de Caballero de poñerse sempre do lado das grandes concesionarias en lugar de defender o interese público e os dereitos do persoal de servizos municipais
Xabier P. Igrexas: “Que faga un oco na súa axenda institucional de misas e procesións e dedique apenas uns minutos a escoitar ao persoal de mantemento de zonas verdes”
O Bloque Nacionalista Galego esixe ao concelleiro de Parques e Xardíns, Ángel Rivas, que medie para unha solución xusta na folga indefinida no servizo de mantemento de zonas verdes de Vigo ou dimita se é incapaz de facelo. A fronte nacionalista responde así ás acusacións realizadas polo edil socialista, a quen lle reclaman unha rectificación das mesmas por responsabilizar con “falsidades” tanto ao persoal como ao propio Bloque da presenza de lixo e danos ao mobiliario urbano.
“As declaracións do señor Rivas son o retrato dun goberno tan inútil como fóra da realidade”, censurou o portavoz municipal do BNG de Vigo, Xabier P. Igrexas, quen considerou as declaracións do concelleiro de Parques e Xardíns da “máxima gravidade” e por “faltarlle ao respecto á intelixencia das viguesas e dos vigueses pretendendo facer culpábel ao BNG de todos os problemas que crea a súa propia incapacidade na xestión”.
Igrexas esixiu ao edil que exerza as súas competencias lembrando que non moveu un só dedo para unha saída á folga neste servizo municipal da súa competencia, que cumpre este martes 8 xornadas. “Que faga un oco na súa apretada axenda institucional de misas e procesións, para as que sempre está disposto con verdadeiro entusiasmo e nas que supoño que lle lembrarán que mentir é pecado, e dedique apenas uns minutos do seu tempo a escoitar ao persoal e a mediar para lograr unha solución xusta”, ironizou
O portavoz municipal nacionalista lembrou que o BNG leva demandando dende o inicio que o Goberno local actúe para mediar coa UTE concesionaria diante do bloqueo da negociación colectiva. De feito, Igrexas mantivo un encontro coa representación sindical para atender as súas reivindicacións fronte á ameaza de que os seus salarios se vexan empobrecidos e perdan poder adquisitivo.
Caballero sempre do lado das grandes empresas
Na mesma liña, lamentou que o Goberno de Abel Caballero volva aliñarse cunha gran concesionaria cando se produce un conflito laboral nun servizo de titularidade municipal en lugar de defender o interese público e o dereito das traballadoras e traballadores, como ocorreu nos últimos anos no caso das folgas de Vitrasa, do servizo de limpeza de colexios ou na XER. “Para ser un Goberno que se di progresista, a súa xestión é un calco moi logrado do que fai o PP alí onde goberna”, afeou.