O Bloque Nacionalista Galego chama a unha mobilización masiva polo 8 de marzo, Día Internacional da Muller Traballadora, para enviar unha mensaxe clara contra o avance do machismo. A fronte nacionalista defende un compromiso real, con medidas concretas e recursos necesarios da Xunta de Galiza e do Concello de Vigo, para facer da loita pola igualdade unha verdadeira prioridade política.

“Non temos nin medo nin vergoña, e xuntas imos parar a vaga reaccionaria e neofascista que empurra ao machismo”, reivindicou a deputada no Parlamento galego e responsábel local do BNG de Vigo, Carmela González, presentando a campaña nacionalista polo 8M e facendo un chamamento a encher as rúas da cidade na manifestación convocada polo colectivo Resposta Feminista este sábado ás 18:30h dende a praza dos Cabalos. 

González demandou nese sentido reforzar o compromiso feminista dende as institucións fronte ao “crecente odio que só quere perpetuar a discriminación e a opresión” das mulleres. “Só hai unha resposta posíbel: máis feminismo, máis mobilización e máis unión das mulleres en favor da igualdade real”, salientou.

A deputada do Bloque alertou sobre a “dereita reaccionaria e ultraespañolista que pensa que pode pararnos e facernos retroceder para borrar os nosos dereitos, decidiren sobre os nosos corpos, taparnos a boca ou impoñer peores condicións de vida e de traballo polo feito de sermos mulleres”. Fronte a eles, González afirmou que “o feminismo é unha forza imparábel que vai seguir avanzando para conquistar liberdade, igualdade e xustiza”.

Seguindo o lema da campaña do BNG ‘Nin medo nin vergoña’, a responsábel local do BNG defendeu recoller o mandato do feminismo de “máis recursos e menos discursos” para pasar das palabras aos feitos á hora de avanzar en políticas realmente feministas en favor da igualdade.

A ese respecto, González esixiu unha rectificación por parte da Xunta que, durante os últimos 16 anos de desgoberno do PP, só avanzou no recorte e eliminación de recursos e políticas. “Fronte a súa pasividade, o BNG comprometémonos a que Galiza volva ser referente na loita feminista”, reivindicou a deputada nacionalista.

Do mesmo xeito, reclamou ao Concello de Vigo máis medios para medidas de igualdade. “É incomprensíbel que o Concello de Vigo destine apenas 3 mil euros a campañas de sensibilización contra a violencia machista, se negue a crear un programa de apoio ás mulleres ou a despregar máis recursos para atención das súas necesidades, mentres entrega millóns de euros para subvencionar aeroliñas ou luces de Nadal”, remachou.