Carme Adán e Cosme Pombo, deputada e deputado do BNG no Parlamento galego, expresaron o apoio do Bloque á demanda da alumnado da Escola Superior de Arte Dramática para que a titulación deste centro sexa homologada ás titulacións universitarias. Así o subliñaron despois de reunirse co director do centro e representantes do estudantado, a petición do propio alumnado, nas instalacións do centro vigués.

“Queremos deixar claro á Xunta que apoiar esta reclamación non supón máis custe, senón que só se necesita vontade política para facer a homologación”, afirmou Carme Adán, quen considerou que a xuntanza foi moi positiva para coñecer de primeira man as demandas da comunidade da ESAD.

Segundo explicou Cosme Pombo, o obxectivo prioritario é acadar que “a titulación da primeira remesa de alumnos e alumnas do curso que vén sexa de grao e con homologación europea”. O deputado nacionalista destacou que é fundamental que calquera alumno da Escola poida usar a súa titulación “onde faga falta” e que a titulación do estudantado galego non sexa inferior ao do resto.

Evitar a emigración

“Pensamos que coa lexislación vixente a Consellería pode homologar e validar estas ensinanzas superiores cos títulos universitarios”, asegurou Pombo, para quen é imprescindible que esta demanda se cumpra “porque senón o alumnado da ESAD terá que emigrar”.

O deputado do BNG salientou que defender a titulación de grado da Escola Superior de Arte Dramática é unha forma de “impulsar o potencial galego”, así como de respaldar a cultura galega. “Queremos que en Galiza teñamos as titulacións que merecemos”.

En representación do alumnado, Arianna Francescutto destacou que o alumnado reclama “o que contratamos nas matrículas”, é dicir, que os estudos sexan de grao, e “formar parte do sistema universitario”.