O Bloque Nacionalista Galego denuncia o estado de “abandono” da praza do Balado, entre as rúas Rosalía de Castro e Areal, un ano despois de que se paralizaran as obras de humanización. A fronte nacionalista demanda ao Goberno municipal que aclare se recibiu o informe da Dirección Xeral de Patrimonio Cultural da Xunta de Galiza, após a aparición de restos arqueolóxicos, e pide coñecer cando se van retomar os traballos na zona.

“Este ámbito está nun estado de completo abandono, convertido nun vertedoiro de lixo e nunha xincana inaccesíbel para o paso peonil con valados tirados e oxidados”, lamentou o portavoz municipal do BNG de Vigo, Xabier P. Igrexas, recollendo queixas da veciñanza que demanda recuperar este ámbito e que impediu a talla do arboredo de grande porte proxectada inicialmente polo alcalde, Abel Caballero.

Igrexas chamou a garantir a limpeza, a seguridade e a accesibilidade da praza do Balado, un lugar utilizado por crianzas e familias como espazo lecer ao aire libre, como vén reclamando a veciñanza da contorna “desde hai moito tempo sen obter ningunha resposta”. Por estes motivos, dende o Bloque interpelaron ao Goberno local para que explique cando van finalizar as obras de humanización, previstas para decembro de 2023.

“Estamos diante dun exemplo máis da política de grandes titulares e fotografías de Abel Caballero, que unha vez marchan os focos da propaganda e o autobombo o que queda é a escuridade do abandono”, valorou o portavoz municipal do BNG.