“É indecente que un Goberno municipal que deixou sen gastar 436 millóns de euros no último mandato teña os servizos sociais baixo mínimos para enfrontar situacións de verdadeira emerxencia social”, denunciou o candidato do BNG á Alcaldía de Vigo, Xabier P. Igrexas, que chamou a reforzar esta área diante do actual contexto de agravamento da crise, con máis de 60 mil persoas en risco de exclusión social e pobreza en Vigo segundo o índice Arope.

Igrexas asegurou que esta proposta de triplicar o número de traballadoras e traballadores sociais, que hoxe apenas son 31, permitiría á cidade cumprir cos ratios mínimos fixados polo Consello do Traballo Social.

“Non podemos entender como o Goberno municipal deixou sen gastar preto de 10 millóns de euros no capítulo de persoal en 2022 e ten case 400 prazas de persoal do Concello sen adxudicar”

Nese sentido, o candidato do BNG reiterou a proposta nacionalista de crear unha Renda Social Municipal co propósito de complementar as pensións non contributivas, a Risga e o Ingreso Mínimo Vital até un mínimo do 75% do salario mínimo. “Inda que non se poida inaugurar, axudar ás familias máis vulnerábeis e ás persoas empobrecidas ten que ser unha verdadeira prioridade”, defendeu, en contraposición co “tesoirazo” aplicado este ano polo Goberno local cun recorte dun 22% das axudas sociais.

Vivendas de emerxencia

Outra das medidas do programa nacionalista aposta por ofrecer alternativas habitacionais para persoas en risco de exclusión social, creando e reservando vivenda social para situacións de emerxencia. Na mesma liña, Igrexas tamén chamou a despregar medidas de apoio a persoas en risco de ser desafiuzadas para evitar que sexan expulsadas das vivendas. Así mesmo, chamou a despregar iniciativas de ‘Housing First’ como alternativa para facilitar a inclusión das persoas sen fogar. “Ten que haber un compromiso real para facer do Concello de Vigo un parapeto social para que ninguén quede atrás, iso é humanizar de verdade unha cidade”, concluíu Igrexas.