“Pasaron dúas décadas sen que os Gobernos galego, español e municipal tomasen ningunha medida malia as graves consecuencias desta contaminación”, recriminou a deputada viguesa do BNG, Carmela González, que lembrou que esta situación xa foi denunciada polas veciñanza afectada e a xustiza resolveu que “non existían dúbidas da responsabilidade da actual Stellantis en Vigo”.

A deputada nacionalista asegurou que a actividade industrial e o coidado medioambiental non son elementos incompatíbeis

“Stellantis debe cumprir a legalidade medioambiental tomando todas as medidas que sexan precisas”, reclamou, emprazando á Consellería de Medio Ambiente a garantir que a factoría viguesa cumpre coa lexislación.

González fixo referencia ás afectadas e afectados, “que xa se dirixiron ao concello de Vigo, ao Estado, á Xunta, á Valedora do Pobo, á Unión Europea” sen que até a día de hoxe se teña adoptado ningunha medida para corrixir esta situación. De feito, lamentou que pese a que estes colectivo veciñais solicitaron entrevistas e mandaron escritos ao Goberno galego do PP, só recibiron como resposta os informes da propia empresa descartando esta contaminación.

Silencio insultante

Na mesma liña, o concelleiro e candidato do BNG de Vigo, Xabier P. Igrexas, lamentou o “silencio tan atronador como insultante” de todas administracións diante das reiteradas denuncias veciñais. “É inexplicábel que a estas alturas, cando xa hai solucións técnicas que dan garantías, a veciñanza de Matamá siga padecendo molestias e consecuencias sobre a saúde por causa da actividade industrial”, cuestionou.

Igrexas trasladou o “completo apoio” do Bloque ás veciñas e veciños afectados e o compromiso para seguir reclamando que “sexan atendidas as súas demandas, que non son outras que poder vivir de maneira tranquila, segura e saudábel nas súas propias vivendas”.