Iolanda Veloso lembra que o Bloque leva meses pedindo explicacións e pediu a destitución dos concelleiros implicados nos enchufes

Vigo, 30 de marzo de 2015.- No pleno extraordinario celebrado esta mañá sobre a contratación nas empresas concesionarias, a portavoz municipal do BNG, Iolanda Veloso, instou ao alcalde da cidade a dar explicacións sobre os diversos procesos xudiciais abertos que teñen algún tipo de relación co Concello de Vigo.

“Non somos nós quen temos que dar explicacións, ten que dalas o propio alcalde como máximo responsable deste goberno”, destacou Iolanda Veloso, quen criticou que a reacción ás sucesivas demandas de información por parte do BNG sobre as investigacións xudiciais sexa “a calada por resposta”.

A voceira nacionalista indicou que existen procesos xudiciais abertos, “que teñen que seguir o seu camiño”, apuntou. Pero ademais destes procesos abertos, cómpre dar información “non só aos partidos políticos, senón sobre todo á cidadanía”. “Nós pedimos explicacións políticas sobre o que pasa neste concello”, destacou.