O Bloque Nacionalista Galego vén de renovar os seus organismos internos na comarca de Vigo para reforzar a súa aposta política co reto de impulsar o cambio nos concellos nas vindeiras eleccións municipais de 2027, como paso previo a liderar un novo goberno na Galiza nos comicios de 2028.

“A nosa organización continúa nunha senda de avance e consolidación, tanto desde o  punto de vista electoral como organizativo”, destacou Manuel Caride, reelixido por unanimidade como responsábel comarcal na Asemblea celebrada este xoves na que tamén se aprobou a incorporación de novas caras no Consello Comarcal para “fortalecer o proxecto” sobre os progresos dos últimos anos.

Caride salientou o “papel chave” da militancia do Bloque, que incrementou un 20% na comarca dende o último proceso asemblear en 2021, e a unidade e cohesión interna. “É no compromiso militante onde radica a nosa maior fortaleza fronte a outras formacións políticas, o que nos permite ser referenciais en ámbitos tan importantes como a defensa do idioma, o sindical, o cultural, o feminismo ou o ecoloxismo”, reivindicou.

Dende a fronte nacionalista fixaron como obxectivo seguir ampliando os apoios de cara a dous retos electorais onde aspira a incrementar de forma significativa a súa representación institucional. “As eleccións municipais de 2027 deben servir como elemento de arranque doutra cita electoral transcendental para o Bloque como son as eleccións galegas de 2028, onde o nacionalismo galego está chamado á liderar un novo goberno ao servizo do País”, afirmou Caride.

Nese camiño, defendeu o responsábel comarcal, o BNG vai continuar acompañando o seu papel a nivel institucional nos concellos dun “intenso” traballo social, cun contacto directo e permanente co tecido social organizado e con presenza nas principais problemáticas e conflitos.

Renovación do Consello Comarcal