O Bloque Nacionalista Galego de Vigo insta ao Goberno municipal de Abel Caballero a axilizar a tramitación das axudas sociais e das subvencións a entidades sen ánimo de lucro, diante das importantes dilacións rexistradas en anos anteriores. A fronte nacionalista urxe convocar estas partidas no primeiro trimestre de 2023 para evitar o “grave prexuízo” destas demoras tanto para o tecido asociativo como para as persoas en situación de vulnerabilidade social.

“Non pode ser que o Concello de Vigo, que conta con recursos folgados e cun orzamento millonario, incumpra os seus propios prazos administrativos, convocando tarde e resolvendo e pagando aínda con maior demora”, advertiu o concelleiro e candidato do BNG de Vigo, Xabier P. Igrexas, que subliñou que estes recursos son “esenciais” para o funcionamento e a actividade de entidades de carácter cultural, veciñal, deportivo ou as Anpas, entre outros.

O edil nacionalista asegurou que estes atrasos supoñen “estrangular economicamente” ás asociacións sen ánimo de lucro da cidade que, en moitos casos, están a “compensar déficits da xestión municipal asumindo tarefas que debería desenvolver o propio Concello de Vigo”

No mesmo sentido, Igrexas chamou a axilizar a tramitación das axudas sociais municipais. “Non podemos volver acudir un ano a unha tramitación escandalosamente tan demorada como a que se viviu, por exemplo, na xestión das axudas para comedores”, salientou.

Así, o candidato do BNG apelou ao goberno de Caballero a actuar con “máis xestión e menos propaganda, publicidade e autobombo” para facilitar a tramitación destas subvencións e axudas.