O Bloque Nacionalista Galego reclama explicacións do alcalde de Vigo, Abel Caballero, polo “enésimo” atraso na reforma do estadio de Balaídos. A fronte nacionalista pide a comparecencia do rexedor no próximo Pleno municipal diante das “constantes demoras e improvisación” nunha obra que tería que estar concluída hai cinco anos e pola metade do custo que agora se estima.

“Caballero ten que dar conta sobre este gran fiasco que está a ser a reforma de Balaídos”,  demandou o concelleiro e candidato do BNG de Vigo, Xabier P. Igrexas. Nese sentido, reprochou a “última promesa incumprida” do alcalde, que anunciara que a grada de Marcador estaría operativa este pasado domingo. “A realidade está moi lonxe dese anuncio”, lamentou.

A este novo atraso nas obras de Marcador, Igrexas advertiu de que “non se sabe absolutamente nada” do proxecto para a reforma da grada de Gol, que non conta aínda con ningunha partida orzamentaria. Nese sentido, o edil nacionalista lembrou que o alcalde anunciou hai case unha década que o novo Balaídos estaría listo entre os anos 2017 e 2018.

“Caballero prometeu o Guggenheim do fútbol e o que estamos a ver é unha mala copia da Sagrada Familia, con atrasos constantes, unha improvisación total e unha chapuzada permanente”, criticou o candidato do BNG.