O BNG de Vigo urxe arranxar a iluminación do campo da ETEA, sen luz desde hai ano e medio

Campo da ETEA sen iluminación na metade do terreo de xogo
Campo da ETEA sen iluminación na metade do terreo de xogo

A fronte nacionalista denuncia o abandono por parte do Goberno municipal desta instalación deportiva, que só conta con alumeamento na metade do terreo de xogo.

Xabier P. Igrexas: “Un concello cun orzamento millonario como Vigo non pode consentir ter os clubs deportivos adestrando apiñados porque as luces non funcionan”.

O BNG de Vigo urxe arranxar a iluminación do campo da ETEA, sen luz desde hai ano e medio

O Bloque Nacionalista Galego de Vigo urxe arranxar a iluminación do campo da ETEA, que leva máis de ano e medio sen luz na metade do terreo de xogo. A fronte nacionalista denuncia o “inexplicábel” abandono desta instalación deportiva, malia as numerosas queixas dos clubs e deportistas, e o silencio por parte do Goberno municipal diante das interpelacións realizadas polo Bloque para esixir actuacións.

“O BNG temos que denunciar un exemplo máis do desleixo e da total falla de xestión do goberno de Abel Caballero nunha cuestión tan importante como é o mantemento e o correcto funcionamento das instalacións deportivas do noso concello”, criticou o concelleiro do BNG en Vigo, Xabier P. Igrexas.

O edil nacionalista explicou que os clubs e deportistas que fan uso deste campo, ubicado no barrio de Teis, só poden adestrar na metade do terreo de xogo desde hai máis dun ano e medio porque non funcionan as torres de iluminación.

“En determinadas horas do día, nomeadamente nas que se fai un maior uso da instalación, é impracticábel a metade non iluminada do campo”, critica o concelleiro do BNG en Vigo, Xabier P. Igrexas.

Igrexas cualificou de “aberrante” a falla de solucións do Goberno local. Desde o BNG trasladaron esta situación na última Comisión Informativa de Deportes, celebrada a pasada semana, sen obter aínda ningunha resposta nin explicación por parte do concelleiro na materia, Manel Fernández.

“Un concello que ten un orzamento millonario, que goza dunha importante capacidade de intervención, non pode consentir ter os clubs deportivos e deportistas da cidade adestrando apiñados na metade do campo sinxelamente porque as luces non funcionan”, recriminou o concelleiro do Bloque.

O BNG de Vigo urxe arranxar a iluminación do campo da ETEA, sen luz desde hai ano e medio