Na xornada de reflexión do candidato vigués do BNG ao Congreso, Brais Ruanova, compartiu na vila de Bouzas un vermú informal con outros integrantes da candidatura, como Nuno Galán, a deputada no Parlamento galego e coordinadora local da campaña, Carmela González, o concelleiro e concelleira en Vigo, Filipe Abalde e Ana Martínez, e mais o responsábel comarcal da fronte nacionalista, Manuel Caride.

Un encontro distendido que serviu, en palabras de Ruanova, para “poñer en común as sensacións que deixan dúas semanas intensas de campaña” e tamén para preparar a abordaxe dunha “xornada electoral que vai ser chave para o futuro de Vigo e de Galiza”.

O candidato quixo expresar o seu “agradecemento inmenso á militancia e simpatizantes do BNG que permitiron desenvolver unha grande campaña na cidade para visibilizar que hai unha alternativa propia fronte ás forzas estatais”.

Ruanova fixo un chamamento á participación nas eleccións de mañá. “Que ningún voto quede na casa. Todo os votos contan e confío en que haberá moitos votos coa idea clara de facer contar Galiza”, afirmou. Neste sentido, apelou de maneira expresa ao voto xuvenil que “vai ser decisivo”. “As mozas e mozos de Vigo teñen que saber que se non votan outros decidirán por eles e elas. Na súa man está decidir o seu futuro”, remachou.

Para o que resta de xornada de reflexión o candidato aproveitará o día para “desfrutar da praia e do fantástico clima que temos no sur de Galiza”. Mañá, domingo, exercerá o seu voto no CEIP Josefa Alonso, en Matamá, ás 10:30h acompañado do Portavoz municipal do BNG de Vigo, Xabier P. Igrexas, e de outros integrantes da candidatura e dirixentes da fronte nacionalista.