O grupo municipal do BNG fixo hoxe unha valoración do  transcurso da campaña electoral en Vigo e ao respecto seu portavoz municipal, Santi Domínguez, destacou que o PP se presenta “con 60.000 parados máis na comarca que hai 4 anos e nenos e nenas que xa non poden comer nos comedores escolares”. Afirmou tamén que chegan tamén outras forzas políticas “que non foron quen de criticar a discriminación de Vigo ou non traballaron a prol da cidade”.

Santi Domínguez destacou que a valoración que o grupo municipal do BNG fai da campaña “reflexa o que ten sido o traballo das distintas forzas políticas na cidade”. Neste sentido salientou que o PP “preséntase con máis mentiras e un pobrísimo bagaxe”, polo que asegurou que o goberno de Feijóo “suspende monumentalmente” e “nin Feijoo nin os que aterran na cidade foron quen de falar do que ten feito o PP e a Xunta”.

O nacionalista afirmou que precisamente a actuación do PP nestes catro anos caracterizouse pola “total discriminación” hacia Vigo, polo que só poden limitarse a vir “a mentir sobre o ensino e a sanidade”. Ao seu xuízo, a conclusión da campaña do Partido Popular é que suspende “por non ter presentado ningún logro nen ningunha iniciativa”, e pola contra, aumentar os nenos e nenas que teñen que pagar máis polas prazas escolares, incrementar o número de persoas dependentes que xa non poden ser atendidos e deixar un sector naval agonizante.

Segundo apuntou o portavoz municipal do BNG tamén hai outras forzas políticas que acometeron unha reforma laboral contraria aos dereitos dos traballadores e traballadoras ou que non se opuxeron á reforma levada a cabo polo PP. Asemade criticou ás forzas políticas que teñen seu centro de decisión en Madrid ou que votan con formacións contrarias aos intereses de Galiza. “Queda claro que a única forza que mantén seu compromiso con Vigo é co país é o BNG, e o demostra co  seu traballo”, subliñou.

Xabier Alonso, pola súa banda, explicou que o BNG entende que o traballo institucional “é complementario ao traballo de rúa”, polo que ao longo desta campaña os e as nacionalistas mantiveron xuntanzas con máis de 2.000 persoas, cos tres sindicatos e con todas as asociacións veciñais.

“O grupo municipal do BNG quere pedir o voto para o Bloque Nacionalista Galego para cambiar as cousas e modificar as políticas. Queremos que se rescaten ás persoas e non os bancos”, subliñou Iolanda Veloso. Finalmente, Santi Domínguez anunciou que o BNG pechará a campaña en Vigo o vindeiro venres ás 20.15 horas no pavillón de Navia.