Nun encontro veciñal no que participaron a número 2 da candidatura do BNG por Pontevedra, Carme Adán, e o portavoz municipal, Santi Domínguez, a nacionalista subliñou a necesidade de que as políticas do próximo goberno da Xunta teñen por obxectivo prioritario a “reactivación do emprego en Galiza en xeral e en Vigo en particular”. Neste sentido Domínguez destacou o traballo do grupo municipal nacionalista, que foi quen de impulsar o Plan de Emprego municipal, dando cabida nel a voz das asociacións veciñais.

Carme Adán trasladou aos representantes veciñais a preocupación do BNG polos datos do desemprego en Vigo, sumando xa 33.000 persoas en paro, sendo a cidade galega na que máis aumentou o desemprego. “Se ben Feijóo se presentou como o candidato que remataría con este problema en 45 días, agora preséntase como o campión dos datos do paro”, destacou.

A candidata nacionalista salientou que o compromiso do BNG neste eido está avalado pola súas actuacións, como é o caso do Plan de Emprego Municipal, no que ademais de fomentar a creación de postos de traballo se impulsa a participación cidadá. “A participación da cidadanía e a interrelación coas asociacións veciñais para dar resposta ás súas demandas ten sido unha constante no traballo do Bloque”, destacou.

Responsabilidade do Bloque

“Non é o mesmo que goberne unha forza política ou outra, e iso ponse de manifesto vendo os datos de desprego. Pero tampouco é o mesmo a responsabilidade dunha forza política na oposición como o BNG que a outra, cómplice de Feijóo e Rajoy”, asegurou Santi Domínguez nesta liña.

Segundo o portavoz municipal nacionalista, “se o BNG non impulsara desde a súa responsabilidade na oposición o Plan de Emprego Municipal, na cidade teriamos moitos menos postos de traballo”.