Iolanda Veloso critica a falta de vontade política do PP para salvar Peinador

Iolanda Veloso critica a falta de vontade política do PP para salvar Peinador

Aeroporto de Peinador (Vigo)A voceira municipal do BNG, Iolanda Veloso, ao remate da reunión dos grupos municipais sobre Peinador celebrada hoxe, manifestou que o PP, nas diferentes administracións nas que goberna, non está tomando as decisións que permitan facer rendíbel o aeroporto de Vigo, e que ten diferentes posicións nas diferentes institucións nas que actúa. Segundo a portavoz, O PP, tanto na Xunta como no goberno do estado ten que tomar decisións que rematen con esta situación, teñen que garantir o servizo público, e adoptar medidas que fomenten a complementariedade e viabilidade dos tres aeroportos. “No canto disto, dedícanse a financiar a compañías aéreas privadas, o que supón unha distorsión e non unha solución ao funcionamento dos aeroportos”.

A voceira municipal do BNG, na súa comparecencia de hoxe, lembrou tamén ao alcalde a súa obriga de defender a viabilidade de Peinador onde ten que facelo, no Comíté de Coordinación, xa que as axudas municipais non son as que van salvar o aeroporto. “Entregarlles cartos públicos ás empresas privadas non sirve para resolver os problemas do aeroporto de Vigo, senón para estar permanentemente chantaxeados por elas. Os cartos municipais deben dirixirse, e máis nestes momentos, a resolver as necesidades básicas da cidadanía”.

Na reunión de hoxe presentouse a proposta que AENA formulou ao Comité de Coordinación dos Aeroportos Galegos, e que segundo Iolanda Veloso é unha proposta descompensada que non busca conseguir un sistema aeroportuario galego forte e competitivo: “non se trata de competir entre nos os tres, trátase de ser competitivos diante de outros aeroportos, como por exemplo o de Sá Carneiro”. Lembra Iolanda Veloso que a posición preponderante de un dos aeroportos está lonxe da complementariedade que se debería buscar.

O BNG lembra que esta situación ten que rematar, e que só o fará se aqueles que teñen as competencias toman decisións. Desde o grupo municipal ínstase á Xunta de Galicia a asumir o aprobado no mes de xuño no parlamento galego a iniciativa do BNG, aprobado cos votos do PP, no sentido de adoptar medidas que fomenten a complementariedade dos tres aeroportos galegos e de deseñar estratexias e medidas a medio e longo prazo, que fagan competitivo e viábel o sistema aeroportuario galego. Íntase tamén ao goberno do estado a abandoar as propostas de privatización dos servizos aeroportuarios e asumir conxuntamente coas demás institucións a defensa do servizo público.

Iolanda Veloso critica a falta de vontade política do PP para salvar Peinador