“É lamentable que o alcalde non queira consenso para defender o aeroporto de Peinador tal e como hoxe demostrou na xunta de portavoces”, salientou a portavoz municipal do BNG, Iolanda Veloso, tras a reunión. A nacionalista criticou tamén que o rexidor renuncie a defender a terminal viguesa fronte as administracións que teñen competencias, Aena e a Xunta, e adopte un “discurso vitimista”.

Iolanda Veloso salientou que despois do debate de onte, pese a existencia de diferencias entre os grupos políticos, “había algúns puntos en común para crear consenso con diferentes colectivos económicos e sociais da cidade na defensa de Peinador fronte a situación tan grave que está atravesando”.

Segundo explicou a portavoz nacionalista, o alcalde recoñeceu que convocara a xunta de voceiros como resposta á demanda do BNG para formular unha declaración conxunta que recollera a demanda de igualdade de condicións para os tres aeroportos galegos.

Quitar os cartos aos vigueses

“Fronte a situación tan grave que atravesa Peinador, o alcalde renuncia defender o aeroporto fronte a Xunta e Aena, adopta un discurso vitimista e quere quitar os cartos aos vigueses e ás viguesas para regalarllos ás aeroliñas”, denunciou Iolanda Veloso en resposta aos medios.

Para a nacionalista, “é moi sorprendente a actitude do alcalde de hoxe”, xa que segundo criticou neste tema quere facer “o mesmo que fai o PP desde o goberno da Xunta e o Estado”, que é quitarlle os cartos á cidadanía viguesa para “suplir o que deben facer outras administracións”.

Iolanda Veloso denunciou que a actitude do alcalde renunciando a reclamar ás administracións que teñen competencias aeroportuarias “dificulta enormemente a tarefa de defender Peinador”, especialmente despois de ter aprobado onte dúas mocións no sentido de que tanto se hai subvencións como se non, “o importante é a igualdade de condicións para os tres aeroportos”.

Atender as necesidades de Peinador

Iolanda Veloso criticou ademais que o alcalde quera defender Peinador cual “chairego solitario”, mantendo unicamente axudas desde o Concello. “Pero esta non é a solución para o aeroporto. Temos que reclamar ás administracións competentes que atendan as necesidades do noso aeroporto”, subliñou.

A portavoz municipal nacionalista reiterou que para o BNG é fundamental o consenso como vía para garantir o futuro de Peinador e “buscar nexos comúns para defender o aeroporto vigués conxuntamente”.