O candidato nacionalista critica que PP e PSOE xogan de forma electoralista desde a Deputación e o Concello

Vigo, 27 de xaneiro de 2015.- O candidato do BNG ás vindeiras eleccións municipais, Serafín Otero, demanda ao goberno municipal que “dea a coñecer publicamente o proxecto integral de reforma do estadio de Balaídos, “se é que o ten elaborado”, apunta. Ao seu xuízo, a cidadanía “ten dereito a saber que se vai facer e en que prazos, canto vai custar e cantos cartos públicos se van destinar”.

"O PP e o PSOE non poden xogar de maneira electoralista desde a Deputación e o Concello cun asunto tan importante como a reforma do estadio de Balaídos”, subliñou Serafín Otero, para quen coa actitude tanto de PP como do PSOE “semella que o problema é quen saca máis rédito partidista, quen sae máis ou menos na foto”.

O candidato nacionalista considerou que se trata dun proxecto de cidade e dunha remodelación “indispensábel” para garantir a seguridade de xogadores e público. Destacou que desde o BNG volvemos a insistir, “como xa fixemos hai varios meses, en que o que ten que facer o goberno local é dar a coñecer publicamente o proxecto integral”.

Ameazas veladas

“Sabendo que a reforma é indispensábel, seguimos a defender que esta debe estar orientada á mellora da seguridade e a lograr unhas instalacións máis funcionais”, afirmou Otero, quen asegurou que “Vigo non precisa outro Plan Nouvel en Balaídos”. Pola contra, defendeu que en lugar de polemizar desde os medios “o que ten que facer o alcalde é dar a cara, e presentar de maneira transparente o proxecto”.

Por outro lado, cualificou de “intolerábel” que a Deputación ameace de maneira velada con retirar a súa achega económica polo feito de que ningún representante do PP saíse na foto “da falsa primeira pedra”. Segundo criticou, “PP e PSOE volven estar de acordo en algo: en colocar as necesidades da cidade por detrás dos seus intereses partidistas”.