O portavoz nacional do Bloque, Xavier Vence, participará mañá na concentración convocada diante da sede de Novagalicia Banco

O Bloque Nacionalista Galego quere trasladar novamente o seu total apoio ás mobilizacións convocadas polos afectados polas preferentes e subordinadas e que a única solución a este problema é a devolución íntegra dos cartos. Como mostra deste respaldo, o portavoz nacional do BNG, Xavier Vence, participará na concentración que mañá ás 18 horas se celebrará diante da sede central de Novagalicia Banco.

O BNG lembra que a maioría das persoas estafadas polas entidades bancarias a través de produtos lixo como as participacións preferentes e obrigas subordinadas eran pequenos aforradores. Os nacionalistas critican que estes pequenos aforradores acabaron vendo como o diñeiro froito do seu traballo se vía inicialmente inmobilizado por esas entidades bancarias, en Galiza fundamentalmente as antigas caixas de aforro.

Para o Bloque, esta estafa produciuse “coa anuencia dos diferentes gobernos de Madrid, que ampararon e consentiron estas prácticas bancarias sen dúbida fraudulentas”, segundo destaca o responsable comarcal do Bloque, Manuel Caride.

Quita inxusta

“A día de hoxe, lonxe de solucionarse esta problemática, agravouse aínda máis por mor da decisión do goberno de Mariano Rajoy de proceder a unha quita totalmente inxusta sobre os aforros”, sinala o responsable nacionalista, quen considera que “a única solución posible para as persoas estafadas é unha solución política e que ten que rematar coa devolución íntegra do seu diñeiro”.

Manuel Caride criticou que, pola contra, o PP impide esta solución ao votar a favor dunha quita “que oficializou o roubo dos aforros”. Avanzou que na concentración convocada polas plataformas de afectados e afectadas polas preferentes e subordinadas ademais do portavoz nacional do BNG, participarán diversos cargos orgánicos e institucionais da formación.