A número 2 do BNG por Pontevedra, Carme Adán, destacou este xoves que o PP na Xunta foi un “goberno insensible” porque reduciu as axudas para as mulleres vítimas da violencia de xénero. Na súa intervención nas XX Xornadas de Mulleres Veciñais, a candidata expresou o compromiso de “retomar a igualdade como unha prioridade para o vindeiro goberno galego”.

Carme Adán criticou duramente os recortes que a Xunta levou a cabo nos últimos tres anos e medio en materia de igualdade e loita contra a discriminación das mulleres. “Non pode existir unha sociedade democrática sen igualdade”, defendeu a candidata do BNG.

Explicou, a este respecto, que nos últimos tres anos o Goberno galego impulsou unha política que estivo claramente orientada a cuestionar os dereitos das mulleres, a desmantelar a estrutura administrativa que daba corpo ás políti­cas a prol da igualdade e a practicar recortes nos servizos públicos. “O PP impulsou a substitución das políticas de igualdade polo reforzo do rol tradicional das mu­lleres”, manifestou.

Mudar a situación

Co obxectivo de mudar esta situación, a candidata nacionalista subliñou que cómpre levar a cabo “actuacións decididas para diminuír o efec­to da aplicación do modelo regresivo do Partido Popular, que supuxo a mayor precariedade das mulleres e a súa constante perda de dereitos”

Carme Adán, neste sentido,  afirmou que o BNG comprométese a retomar as “políticas a prol da igual­dade, cun enfoque transversal”. Entre as medidas que destacou figuran o impulso da visibilidade e participación das mulleres nos espazos de participación e decisión, de carác­ter público ou privado; garantir a igualdade de oportunidades e de trato, fomentar a contratación e inserción laboral das mulleres a través de políticas activas de emprego dese­ñadas específicamente e mellorar a atención e a saúde das mulleres, así como a prevención e a seguranza no eido laboral.

A candidata salientou que as propostas de goberno do BNG inclúen asemade a intensificación dos programas de apoio ás mulleres vítimas de violencia de xénero, analizando e modificandos protocolos existentes neste eido e elaborar unha lei galega de saúde sexual e reprodutiva para garantir a información e o acceso á anti­concepción e á interrupción voluntaria do embarazo nos recursos públicos de saúde.