A representación do BNG abandona o acto institucional polo Día Nacional de Galiza en Vigo polo desprezo da vicepresidenta Calviño á lingua galega

Nadia Calviño e Abel Caballero (Imaxe: Concello de Vigo)
Nadia Calviño e Abel Caballero (Imaxe: Concello de Vigo)

Calviño realizou a súa intervención, agás unha breve introdución, en español o que para as nacionalistas é un exemplo máis de galegofobia.

Xabier P. Igrexas: "Abonda deste españolismo casposo que considera que o galego non serve para as cousas importantes"

A representación do BNG abandona o acto institucional polo Día Nacional de Galiza en Vigo polo desprezo da vicepresidenta Calviño á lingua galega

O concelleiro do BNG de Vigo, Xabier P. Igrexas, e  a deputada no Parlamento galego, Carmela González, abandonaron o acto institucional do Concello de Vigo polo Día Nacional de Galiza, aos poucos minutos de se iniciar a intervención da vicepresidenta do Goberno español, Nadia Calviño, que exercía de pregoeira no acto.

Esta decisión está motivada polo "desprezo ao idioma oficial de Galiza, a lingua galega", por parte de Calviño que, para alén dunha brevísima introdución en galego, fixo a súa intervención en español. "Non podemos seguir soportando esta galegofobia que reduce a nosa lingua propia a un idioma de segunda, e menos nun acto institucional do Concello", criticou Igrexas.

O portavoz municipal nacionalista sinalou que a vixente ordenanza municipal de normalización lingüística estabelece o galego como idioma oficial e lingua vehicular do Concello.

"Abonda deste españolismo casposo que considera que o galego non serve para as cousas importantes", afirmou. 

Para Igrexas "resulta especialmente ofensivo e denigrante que algo así suceda nun acto para celebrar o Día Nacional de Galiza na maior cidade galega".

Desde a fronte nacionalista xa advertiran nos pasados días da inxustificada designación de Calviño como pregoeira, por carecer de vínculos coa cidade e polo uso partidista dun acto institucional que, ademais, tivo que ser adiado até o 12 de agosto para encaixalo na axenda da vicepresidenta.

A representación do BNG abandona o acto institucional polo Día Nacional de Galiza en Vigo polo desprezo da vicepresidenta Calviño á lingua galega