O Bloque Nacionalista Galego propón mobilizar 25 millóns de euros adicionais dos remanentes municipais para aumentar os recursos do Concello de Vigo para emprego, vivenda, política social, transporte, montes e investimentos nos barrios e parroquias. A fronte nacionalista vén de formular emendas á modificación orzamentaria do Goberno de Abel Caballero para mellorar as políticas municipais nestas áreas e evitar que estes recursos resulten bloqueados o vindeiro exercicio.

Así o anunciou este mércores o portavoz municipal do BNG de Vigo, Xabier P. Igrexas, considerando que estes remanentes, resultado da “permanente inexecución” dos orzamentos municipais pola “incapacidade e falla de xestión” do Goberno local, teñen que “ser devoltos ás viguesas e vigueses en forma de políticas que atendan as necesidades reais e non unicamente enterralos en obra inaugurábel e pagos a grandes empresas”.

Igrexas cuestionou así que o Goberno de Caballero vaia destinar 20 dos 31 millóns do modificativo de crédito (dos case 115 millóns dispoñíbeis en remanentes) a unha nova indemnización a Vitrasa, a facer fronte a sentenza xudicial polos aparcamentos privados e a un último pago polo ascensor HALO.

Por estes motivos, dende o BNG veñen de trasladar 6 propostas concretas para mobilizar 25 millóns de euros adicionais, para atender os principais problemas da cidade, advertindo novamente do risco de que estes remanentes non poidan ser utilizados a partir do próximo ano polo previsíbel levantamento da suspensión da regra de gasto.

PLAN CIDADE - 12,5 millóns de euros
Co obxectivo de poñer fin ao “continuado abandono” que padecen os barrios e parroquias de Vigo, a fronte nacionalista chama a poñer en marcha a cargo dos remanentes o denominado ‘Plan Cidade’, un programa plurianual e extraordinario de investimentos dotado con 12,5 millóns de euros para atender as necesidades de toda a cidade, con participación directo do movemento veciñal na definición dos usos.

Plan Emprego Municipal – 1,2 millóns

Outro dos eixos prioritarios a xuízo do Bloque é o laboral, nun momento no que a cidade continúa a ter máis de 15 mil persoas no desemprego. Por este motivo, propoñen duplicar a actual partida destinada ao Plan de Emprego Municipal, incorporando 1,2 millóns adicionais. No entanto, o portavoz nacionalista afeou que en pleno mes de agosto continúa sen convocarse o plan correspondente a este ano.

Axuda Social Extraordinaria – 6 millóns

Diante da emerxencia social que atravesa a cidade, con máis de 60 mil viguesas e vigueses en risco de exclusión social e pobreza, o BNG pide convocar unha Axuda Social Extraordinaria dotada con 6 millóns de euros este 2024, e que sexa complementaria a outras axudas como a Risga, IMV, PNC ou RAI. “Trátase de recuperar o Cheque Social que fora impulsado polo BNG e que o Goberno de Caballero suprimiu hai varios anos”, subliñou o voceiro municipal do Bloque.

Plan Facilitador do Alugueiro – 2,25 millóns

A fronte nacionalista reiterou ademais a súa proposta dun Plan Municipal Facilitador do Alugueiro con 2,25 millóns de euros que, entre outras medidas, permita que o Concello asuma e responda polos avais e seguros que están esixindo á hora de formalizar un alugueiro, ademais dunha liña de axudas para anticipar os pagos das fianzas e permitir a súa devolución en 24 meses sen xuros, destinada especialmente a mocidade e persoas con baixos recursos. “Unha medida destinada especialmente á mocidade e ás persoas con baixos recursos, multiplicando por 15 a raquítica partida de subvencións de rehabilitación para alugueiro que vén de aprobar o Goberno municipal”, defendeu Igrexas.

Bus gratuíto para desempregadas e menores de 14 anos – 1 millón

Dende o BNG insistiron tamén na necesidade de facilitar o acceso ao transporte urbano dos colectivos máis vulnerábeis da cidade. Así, demandan alargar as bonificacións actuais da Pass Vigo para facer gratuíto o bus para as persoas en situación de vulnerabilidade, perceptoras de axudas sociais e desempregadas de longa duración cunha partida de 1 millón de euros neste exercicio. Do mesmo xeito, piden que non teña ningún custo para as menores de 14 anos, na liña doutras cidades galegas.

Anel verde – 2,5 millóns