A portavoz nacional do BNG, Ana Pontón, reclamou o rescate inmediato da AP-9 porque non só é viable dende o punto de vista xurídico e un acto de xustiza cos galegos e as galegas, senón tamén porque “neste momento é o máis rendible para as arcas públicas”. “Rescatar a AP-9 non só e viable, senón que é a mellor opción desde o punto de vista económico porque suporía un aforro millonario só en peaxes na sombra”, asegurou.

Pontón referiuse así aos 2.844 millóns de euros que o Estado, “cos cartos que saen dos nosos impostos”, vai ter que pagar á concesionaria da autopista só en peaxes na sombra até o 2048, cando finalice a concesión. Unha cifra que recolle o propio Consello de Estado e que é moito máis elevada que os 904,7 millóns de euros que custaría rescatar a AP-9, segundo se desprende do informe elaborado pola Universidade de Coruña a petición do BNG, presentado hoxe a axentes sociais e económicos en Vigo.

“Neste momento, ter unha AP-9 galega e libre de peaxes e só unha cuestión de vontade política”, afirmou Pontón, que subliñou que os 904,7 millóns de euros están calculados polo valor de mercado da autopista, o que estivo disposto a pagar hai tan só seis meses un “fondo voitre” actualizado co IPC. “Non son, polo tanto, os 4.000 millóns de euros que dicía o Goberno do PP de Rajoy nin os 6.000 que está dicindo o Executivo de Pedro Sánchez nin tampouco os 2.355 millóns que calcula o informe encargado polo Goberno da Xunta a unha xestoría que, casualmente, ten como cliente a Audasa”, engadiu.

É por iso que a líder do BNG emprazou a Alfonso Rueda a que explique aos galegos e ás galegas por que “quere darlle a Audasa 1.450 milllóns de euros máis do que corresponde. “Unha vez máis vemos o PP poñendo por diante de Galiza os intereses dunha multinacional”, agregou, advertindo ademais que “ningún galego nin galega entendería o que público pague máis que un fondo voitre”.

Máis unha vez, a líder do BNG urxiu que se poña fin á “estafa” da AP-9 e á “discriminación” que a diario sofren os usuarios e usuarias da autopista. Reclamou así ao Goberno do Estado que desista do recurso que xa ten presentado ante a Comisión Europea e acate a súa primeira resolución, na que este organismo da UE considerou ilegais as prórrogas da autoestrada galega.

Unha ilegalidade que corrobora tamén o estudo feito para o BNG polos académicos Carlos Aymerich e José Antonio Blanco tanto no que ten que ver coa prórroga de 10 anos aprobada en 1994 polo Goberno do Partido Socialista como a de 25 anos asinada polo Executivo do PP, pola que “teremos que pagar peaxes até o 2048 se non hai rescate”, salientou.

A portavoz nacional explicou, seguindo o estudo da UDC, que coa ampliación do tempo da concesión á autoestrada de 39 a 75 anos “é evidente que houbo unha alteración substancial do contrato inicial”, polo que debería terse licitado un novo para que calquera outra empresa puidese concorrer ao mesmo. “Vulnerouse a legalidade de contratos non só en canto á normativa comunitaria senón tamén á propia normativa do Estado español, vulnerando os principios de igualdade e transparencia na contratación pública”, apuntou.

De estafa legalizada a estafa ilegal

De aí a súa insistencia en que a adxudicación directa da prórroga da AP-9 “é ilegal e pode e debe ser anulada”. “Até agora sabiamos que as peaxes da autopista eran unha estafa legalizada, pero agora sabemos que ademais é unha estafa ilegal”, diante da que “só hai unha opción, que é anular o contrato”, precisou.

Afondando na mesma cuestión, recalcou que “se a ampliación é ilegal, a concesionaria non ten dereito ao cobro do lucro cesante”, unha cuestión que os expertos da UDC tiveron tamén en conta para calcular o valor do rescate. Todas razóns polas que o Goberno do Estado, considerou Pontón, ten que “aproveitar a porta” que abriu a Comisión Europea, afrontando dunha vez o rescate da autoestrada “para non traballar en contra dos intereses do País”.

“Chegou o momento de que Galiza tome o control da AP-9 e de acabar coa discriminación que supón que os galegos e as galegas paguemos as peaxes máis altas e durante máis tempo que o resto de cidadáns do Estado español”, concluíu a líder nacionalista.

Compromiso do BNG co rescate

Pola súa banda, o portavoz municipal do BNG de Vigo, Xabier P. Igrexas, reiterou o compromiso da fronte nacionalista con poñer fin á "estafa" da AP-9 para que "Audasa deixe de forrarse literalmente a costa das galegas e galegos".

"Este debate existe grazas ao empurre social de moitos dos colectivos que hoxe nos acompañaron e tamén ao compromiso firme e determinado do Bloque que persegue un obxectivo común e irrenunciábel: unha AP-9 galega e libre de peaxes", manifestou.

Nese sentido, acusou tanto ao PP como ao PSOE de manter unha posición "cínica" a respecto do rescate da concesión da autoestrada galega. "Se hoxe temos importantes bonificacións nas peaxes, que en breve terán que incrementar até o 75%, é grazas ao BNG facendo valer o seu voto decisivo no Congreso", destacou Igrexas.

O portavoz municipal nacionalista puxo tamén en valor o acordo do Pleno do pasado mes de xullo, a iniciativa do Bloque, en favor da anulación da prórroga ilegal da concesión, do rescate da mesma e da transferencia da xestión AP-9 a Galiza. "Se o Concello de Vigo se manifestou de forma clara foi grazas á iniciativa do BNG a pesar da incomprensíbel abstención do PSOE de Abel Caballero", remachou.

CONSULTA O ESTUDO ELABORADO POLA UDC PARA O RESCATE DA AP-9