O BNG de Vigo urxe reactivar o Consello Sectorial de Urbanismo antes da aprobación definitiva do novo PXOM
A fronte nacionalista pide constituír este organismo obrigatorio con representación dos axentes urbanísticos e do tecido social para contar cun Plan Xeral con participación
Xabier P. Igrexas: “É a derradeira oportunidade para que o Goberno de Caballero rectifique a tramitación dun PXOM que marcou todos os récords de opacidade”
O Bloque Nacionalista Galego urxe constituír e reactivar o Consello Sectorial de Urbanismo para poñer fin á “opacidade” do novo Plan Xeral de Ordenación Municipal (PXOM) de Vigo antes da súa aprobación definitiva. A fronte nacionalista chama a poñer en marcha este organismo consultivo, de carácter obrigatorio e con representación dos axentes urbanísticos e do tecido social e veciñal, emendar a falla de transparencia que marcou a tramitación do Plan.
“Con esta solicitude dámoslle ao Goberno de Abel Caballero unha derradeira oportunidade de rectificar e sacar o novo PXOM da escuridade dos despachos no que foi elaborado, de costas á cidade e ao ditado dos poderosos intereses dos de sempre”, afirmou o portavoz municipal do BNG de Vigo, Xabier P. Igrexas.
Dende o Bloque lembraron ademais que este Consello Sectorial de Urbanismo é un dos entes obrigatorios recollidos no vixente Regulamento de Participación Cidadá do Concello de Vigo no seu artigo 41. Un espazo “óptimo”, destacou Igrexas, para que Vigo conte cun PXOM elaborado con diálogo e participación de todas e todos os vigueses e para toda a veciñanza da cidade.
“Suporá emendar, inda que tarde, unha tramitación do Plan Xeral que marcou todos os récords de falla de transparencia, cunha equipa redactora que só compareceu 3 veces e cunha nula atención dos millares de alegacións veciñais recibidas”, defendeu o portavoz municipal do BNG.
Igrexas reiterou tamén a necesidade de que o novo PXOM aposte nun Vigo máis sustentábel a nivel medio ambiental, mellor vertebrado territorialmente “deixando de castigar os barrios e parroquias como periferia”, cunha nova mobilidade que pivote no transporte público e garantindo o dereito á vivenda, mobilizando as máis de 22 mil vivendas baleiras que existen nun parque público de vivenda protexida e social.
