O Consello Escolar Municipal aprobou onte unha moción rexeitando de maneira rotunda o traslado do centro e pedindo o seu mantemento até a apertura da nova escola no Barrio do Cura.

O concelleiro do BNG de Vigo, Xabier P. Igrexas, demanda que o Goberno local poña fin á “permanente improvisación e a irresponsabilidade” coa que está a xestionar o futuro da única escola infantil pública do centro da cidade.

A fronte nacionalista pide que o concelleiro de Educación, Gorka Gómez, explique publicamente se vai abrir matrícula no centro para o vindeiro curso e con cantas prazas.

Insisten en demandar un compromiso claro do Goberno municipal para garantir que o Casco Vello e o centro da cidade non van perder a única escola infantil pública de 0 a 3 anos.

Xabier P. Igrexas: “Unha vez xa quedou acreditado que non hai motivo real para trasladala, nin moito menos fechala, hai que poñer fin a este culebrón e garantir que a escola infantil Santa Marta vai estar plenamente operativa no vindeiro curso”.

Interpelada polo BNG na Xerencia de Urbanismo a concelleira, María José Caride, ratificou que non se tramitou ainda ningunha solicitude de licenza de obra no Barrio do Cura.

Xabier P. Igrexas: “Se non hai unha alternativa viábel e adecuada non podemos permitir o feche da única escola infantil pública do centro da cidade”.

As opcións de trasladar as crianzas a Bembrive ou ao IME son para o Bloque falsas alternativas que insisten na improvisación.

Xabier P. Igrexas: “O BNG non aceptamos a posibilidade de que o Concello suprima 45 prazas de escola infantil no Casco Vello cando o que hai que facer é amplialas”.

A fronte nacionalista cualifica de “falsa alternativa para enlear” a opción do traslado ao colexio Picacho, rexeitada de maneira unánime pola comunidade educativa dese centro.

A fronte nacionalista demanda tamén coñecer os informes técnicos municipais que xustifiquen o traslado forzoso por razóns de “seguridade” e insta a manter a escola mentres o Concello non conte cunha alternativa real.