O cabeza de lista do BNG por Pontevedra, Carlos Aymerich, destacou esta noite que estamos no “inicio dunha campaña decisiva para o futuro de Galiza”. No acto celebrado na emblemática Farola de Urzáiz, no que participaron diversos integrantes da candidatura nacionalista así como o grupo municipal, Aymerich asegurou que o electorado terá que escoller entre dous grandes opcións, a do modelo de desmantelamento dos servizos públicos que leva a cabo o PP e a da única forza nacionalista e de esquerdas, que é o BNG.

“A cidadanía ten que escoller entre continuar co PP polo camiño dos recortes e o empobrecemento ou cambiar o xeito de facer política co Bloque cara unha Galiza máis libre e máis xusta”, subliñou o candidato do Bloque na súa intervención. Ao seu xuízo, o PP sabe que non ten a maioría, e que o cambio que Galiza precisa sexa unha realidade depende do traballo e da entrega dos militantes e simpatizantes do Bloque.

Carlos Aymerich salientou asemade que para frear ao Partido Popular cómpre “concentrar o voto na única opción que dende o nacionalismo e a esquerda defende os intereses de Galiza”. Segundo o nacionalista, “non podemos deixar que Feijóo siga desfacendo o país”.

Demolición do país

Carme Adán, pola súa banda, destacou que os tres anos e medio de goberno de Feijóo resúmense en demolición do país, mentres que agora a súa estratexia consiste en “divide e vencerás”, sinalou. A nacionalista asegurou que dende o BNG “imos facerlles frente. Frente aos que entenden a sanidade como negocio, aos que queren a educación para a élite e aos que impiden que Galiza poida producir”.

A candidata do Bloque considerou que é posible que haxa quen se resista a estes cambios, “pero o BNG sae a xogar o partido sen agardar que dende fóra veñan variñas máxicas, senón querendo gobernarnos por nós mesmos”.