O portavoz nacional do BNG, Guillerme Vázquez, e o cabeza de lista por Pontevedra, Carlos Aymerich, realizaron unha visita á Feira Internacional de Produtos do Mar Conxelados Conxemar, que conclúe este xoves en Vigo. Os nacionalistas trasladaron a súa aposta polo sector pesqueiro e dos produtos do mar e denunciar que os gobernos de Mariano Rajoy e Alberto Núñez Feijóo “non apoian ao sector”.

En declaracións aos medios, Vázquez indicou que é necesario o respaldo político a este sector para que se poida “desenvolver e xerar emprego”. Así, criticou que con medidas como o aumento do IVE –que inclúe aos produtos da pesca e a acuicultura– “non se apoia ao sector”, á vez que tamén denunciou a situación derivada do acordo entre a UE e Mauritania, que deixa fóra á flota cefalopodera galega, e criticou ao Goberno por permanecer “impasible” ante iso.

Así mesmo, tamén lamentou que tampouco se apoia ao sector tratando de eliminar na etiquetaxe a orixe dos produtos conserveiros”. Fronte a iso, considerou “evidente” a necesidade dun “cambio de rumbo e apostar por estes sectores que crean emprego”.

Capacidade de decidir

Pola súa banda, o cabeza de lista do BNG por Pontevedra, Carlos Aymerich, insistiu no apoio da formación nacionalista á pesca e o sector transformador e tamén manifestou o seu respaldo á feira Conxemar, tendo en conta a “competencia” que este ano supón o evento que proximamente celebrarase en Barcelona.

O candidato asegurou que para apostar pola pesca galega é necesario que Galiza “teña capacidade de decidir” e, nese sentido, puxo o exemplo de Alaska, onde é “ela e non Washington” a que decide e a que “certifica os produtos” en canto á orixe. “Non estamos dicindo nada estraño”, asegurou Aymerich, recordando que EE.UU. non é “ningún país antisistema”.