A número 2 da lista do BNG pola provincia de Pontevedra, Carme Adán, e o portavoz municipal nacionalista, Santi Domínguez criticaron o incumprimento de Feijóo a respecto da posta en marcha da cidade da xustiza na cidade ao longo desta lexislatura. “Diante dos xulgados de Vigo queremos denunciar a discriminación de Vigo a respecto de outras cidades de Galiza”, manifestou a Adán.

Segundo a candidata, a nova infraestrutura tan longamente demandada polo BNG é unha necesidade apremiante para garantir o bo funcionamento dos diferentes xulgados da cidade, tendo en conta que a de Vigo é a pranta xudicial “máis saturada de Galiza”. Porén, acusou a Feijóo de discriminar Vigo fronte a outras cidades como Pontevedra, A Coruña ou Ourense, que si terán nova sede xudicial. “Vigo quedará á cola en materia xudicial polo incumprimento de Feijóo”.

Carme Adán lembrou que este ten sido un tema “de debate constante no Parlamento” e explicou que o presidente da Xunta sempre buscou fórmulas nas distintas cidades galegas para chegar a acordos agás en Vigo. “Temos a sensación de que non se quere facer. Despois de 10 anos, parece que estamos diante dun expediente X”, comentou.

Compentencia da Xunta

En resposta ás preguntas dos medios sobre a responsabilidade do Concello de Vigo ante a falta de acordo, Santi Domínguez subliñou que a competencia en materia xudicial corresponde á Xunta, e non a administración local, “polo que é a administración autonómica a que ten que velar pola existencia das instalacións xudiciais”.

Segundo explicou o nacionalista, o problema non é a posta a disposición dos terreos, senón o pago das expropiacións e a este respecto noutras cidades chegouse a un acordo. “Curiosamente en Vigo a Xunta nin quixo negociar, sendo unha obra de ámbito supramunicipal”, sinalou.

“Cando iniciou a lexislatura, Feijóo ofreceu un plan de infraestruturas xudiciais no que se contemplaba a cidade da xustiza para Vigo. A lexislatura rematou e Vigo non ten esta dotación”, fixo balance Santi Domínguez.