Iolanda Veloso e Xabier Alonso visitaron Coia e trasladaron aos representantes veciñais o respaldo do Bloque ás súas demandas de mellora dos viais e o saneamento

Vigo, 18 de marzo de 2014.- A portavoz municipal do BNG, Iolanda Veloso, e o concelleiro Xabier Alonso visitaron esta mañá o barrio de Coia, onde se reuniron con representantes das entidades sociais e culturais da zona. No encontro trasladáronlle o respaldo do Bloque a respecto das súas queixas sobre a situación do barrio e a reclamación de que os investimentos do superávit “sirvan para solucionar definitivamente os problemas dos barrios”.

Durante o percorrido por diversas rúas de Coia, Iolanda Veloso criticou que o alcalde teña “o empeño de solucionar os problemas estéticos dalgunhas zonas da cidade con supostas humanizacións pero non se preocupe coa mesma forza por solventar os problemas reais dos veciños e as veciñas de Vigo”.

Neste sentido, a voceira nacionalista fixo referencia á continua rotura de tuberías en diversas rúas, algunhas delas causantes de graves inundacións e a perda irreparable de material de varias asociacións sociais, así como o parcheado das beirarrúas. "Nestes días de sol vemos que estas rúas aguantan, pero nin se reparan definitivamente as tuberías nin as beirarrúas”, denunciou.

Iolanda Veloso lembrou que este mesmo problema é o que se vén producindo desde hai anos noutro barrio, como é o de Teis. “O goberno local debería centrarse en solucionar os problemas graves e reais da veciñanza en lugar de ocuparse dos problemas estéticos dalgunhas zonas”, manifestou.

Precisamente a representante do Movemento veciñal “O noso barrio” Henar Hergueras criticou a situación que se vive en Coia desde hai tempo e asegurou que os desperfectos en diversas rúas do barrio, especialmente Nigrán, Baiona e A Guarda, son continuados desde hai dous anos.