Iolanda Veloso critica que as administracións non tomen medidas para solucionar os problemas que provoca a falta de financiamento das empresas

Vigo, 29 de xaneiro de 2014.- A portavoz municipal do BNG, Iolanda Veloso, destacou que é “unha boa noticia que por fin se corte chapa nas gradas de Barreras”, pero alertou de que a decisión de facer os floteis de Pemex en Galiza “está moi lonxe” de ser a solución global á grave crise que atravesa o sector industrial vigués.

“Felicitámonos de que haxa persoas que volvan a traballar en Barreras, pero a situación da industria é moi complicada”, salientou Iolanda Veloso. Neste sentido explicou que o problema do financiamento crea unha situación “moi grave” ás empresas mentres as administracións non están tomando medidas para solucionala.

A portavoz nacionalista lembrou que a adxudicación dos floteis por parte de Pemex prodúcese ano e medio despois do anuncio feito polo presidente da Xunta de Galiza e tras varios atrasos consecutivos. “Pola cantidade de veces que Feijóo celebrou os contratos con Pemex pensamos que os buques xa estaban construídos”, ironizou.

Iolanda Veloso lamentou que este proceso “levouse a moita xente por diante”, tendo en conta o desprazamento que se produciu de traballadores e traballadoras do naval e o peche de varias industrias auxiliares.