A portavoz municipal do BNG, Iolanda Veloso, acusou ao alcalde de “non querer buscar unha solución real para Peinador” e preferir unha “fóto fácil” baseada en soflamas vitimistas. Para a responsable nacionalista, a actitude do alcalde de non presentar alternativas claras e viables para a terminal viguesa “vaille saír cara a cidade”.

Iolanda Veloso considerou “lamentable” que o alcalde prefira ver como o PP pecha Peinador e así “poder saír de vítima”. Segundo salientou, ao rexidor vigués “gústalle máis ir de chairego solitario que comprometerse realmente co futuro e a viabilidade do aeroporto da cidade”.

“Non sabemos se ao alcalde lle vai saír cara a súa actitude, pero á cidade seguro que si, cando Aena decida pechar a terminal por non ser rendible”, manifestou a portavoz municipal do BNG, quen asegurou que a postura mantida por Caballero “só conduce á ruina”.

Iolanda Veloso subliñou que o BNG si busca solucións reais para Peinador, baseadas na complementariedade das terminais galegas e a súa especialización, así como na igualdade condicións dos aeroportos en función das súas necesidades, tal e como recollía a moción nacionalista aprobada no pleno do pasado luns.

“Está claro que a solución aos problemas de Peinador, ou de calquera outro aeroporto non pode vir dos orzamentos municipais, necesarios para apostar polo emprego e os servizos sociais, nin de soflamas vitimistas que tanto gustan ao alcalde”, engadiu a portavoz municipal do BNG.

Veloso rematou criticando que o alcalde “non quere buscar solucións reais para Peinador. El considera que canto peor, mellor, e así é imposible solventar os graves problemas do aeroporto”.