A portavoz municipal do BNG, Iolanda Veloso, asegurou que o peche do polideportivo de Candeán tras dous anos construido amosa a “ineficacia do goberno vigués”. A nacionalista así o salientou na visita que o grupo municipal realizou a esta parroquia viguesa e na que mantivo un encontro coa directiva e diversos integrantes da Asociación Veciñal de Candeán.

“Non entendemos a que se dedica o goberno local”, manifestou Iolanda Veloso nas inmediacións do pavillón e da zona deportiva ao aire libre, que permanecen valados. “Podemos ver que o polideportivo está rematado e quedou listo hai dous anos despois de facer un investimento de arredor de 2 millóns de euros. É outro claro exemplo de ineficacia”, engadiu.

A portavoz municipal do BNG lembrou que o concelleiro Xabier Alonso fixo unha intervención no pleno para preguntar cando se abrirían estas instalacións deportivas. “A resposta foi un espazo de tempo tan vago como 'inmediatamente', igual que en setembro e que hai dous anos”, sinalou.

Convenio Xunta-Concello

“Queremos que das bastantes ideas que ten o alcalde rescate algunha para abrir este polideportivo”, demandou Veloso. A nacionalista recordou asemade que a construción deste pavillón foi froito dun convenio entre a Xunta e o Concello de Vigo cando o BNG tiña responsabilidades no goberno galego, en concreto na Secretaría Xeral para o Deporte.

Iolanda Veloso destacou ao respecto que “nós cumprimos a nosa parte, tal e como se pode comprobar”. Porén criticou que tras o cambio de goberno na Xunta, “despois de 5 anos seguimos agardando que a Xunta cumpra a súa parte do convenio, que é a remodelación das pistas de atletismo”.

Falta de interlocución coa veciñanza

A portavoz nacionalista tamén salientou a vontade do grupo municipal do BNG de falar con representes da Asociación Veciñal de Candeán, como é a tónica habitual. Neste sentido calificou de “gravísima” a falta de interlocución do goberno local coas entidades veciñais. Precisamente ao respecto, a presidenta desta entidade, Carme Martínez, demandou unha maior comunicación sobre os motivos polos que non se abren as instalacións.