O concelleiro nacionalista acusa ao goberno local de carecer de planificación turística e da parálise da Vigo Convention Bureau

Vigo, 7 de xuño de 2014.- O concelleiro do BNG, Santi Domínguez, felicitou en nome do Bloque á compañía Air France polo décimo aniversario do seu voo Vigo-París, que acaba de cumprirse. O edil subliñou que esta ruta “é o claro exemplo de que non son necesarias as axudas empresas privadas cando hai unha boa planificación e se prima a racionalización dos recursos”.

Santi Domínguez destacou que se unha aeroliña como Air France pode operar dez anos sen axudas “o BNG se pregunta por que non pode acontecer o mesmo co resto das empresas e rutas”. Ao seu xuízo, o problema radica en que a “única política” que desenvolve o goberno vigués está baseada en axudas, en lugar de facer unha planificación sostida no tempo co obxectivo claro de conseguir que Vigo sexa destino turístico.

Así, segundo o concelleiro do Bloque o goberno local carece dunha planificación turística axeitada para unha cidade como Vigo. Considera que esa planificación “podería desenvolverse desde o Vigo Convention Bureau”, pero fronte a iso denunciou que este organismo leva “desaparecido” case tres anos. “Aquí temos unha mostra máis da falta de xestión e a ineficacia do goberno vigués”, asegurou.

Coordinación entre administracións

Santi Domínguez lembrou que durante o goberno bipartito da Xunta e en colaboración coa concellería de Turismo, da que o BNG era titular, realizáronse en París dous actos de promoción deste traxecto. “Isto indica que a liña a seguir consiste na coordinación entre administracións para promocionar a nosa cidade como destino”, destacou.

Segundo subliñou o edil nacionalista, “con ese traballo conxunto acadamos o obxectivo primordial: que a xente de fóra nos visite”, quen criticou ademais que precisamente esta falta de visión global da necesidade de coordinación é unha das causas polas que Peinador non mellora as súas cifras.