O candidato do Bloque á alcaldía subliña que é unha “necesidade” mudar as políticas de escaparate dos socialistas e os recortes dos populares

O portavoz nacional defendeu “votar o 24M para no arrepentirse de resultados inesperados o 25”-,

Vigo, 22 de maio de 2015.- O cabeza de lista do BNG – Asembleas Abertas, Serafín Otero, asegurou na súa intervención no mitin de peche da campaña que “o cambio está moi cerca. Faltan apenas horas para que poñamos fin a catro anos perdidos e comecemos a mudar o rumbo da cidade”. “Un cambio nas políticas e nas maneiras. Que poña por diante as necesidades do pobo, da maioría social que representa a clase traballadora”, subliñou.

Antes de facer a súa intervención, cedeu a palabra a Domitila, a loitadora das preferentes, e a quen o portavoz nacional xe entregara o carné de honra do BNG.

“Poremos fin á política de escaparate, a que antepón a propaganda a dar resposta ás necesidades da xente. E farémolo cortando o paso unha vez máis ao Partido Popular dos recortes e da corrupción. Para Vigo o cambio non é unha opción é unha necesidade. Unha necesidade urxente. Con máis de 32.000 persoas no desemprego e máis de 50.000 vigueses e vigueses baixo a ameaza da exclusión social, non temos tempo que perder. Perdemos catro anos pero podemos e debemos gañar os que están por vir, apostando decididamente polas persoas, poñendo todas as capacidades e todos os recursos ao servizo do pobo, dos seus problemas reais”, asegurou.

“Vigo ten que ser unha cidade para traballar e vivir dignamente. Queremos máis traballo, pero traballo de calidade, con dereitos e salarios dignos. Por iso toda a contratación pública terá cláusulas sociais. Para que ningunha empresa que non respecte os dereitos dos e das traballadoras reciba nin un só euro de diñeiro público. Por iso ampliaremos de maneira decidida o Plan de emprego e poremos en marcha un plan de choque contra o desemprego xuvenil e feminino”.

Erradicar o enchufismo e a corrupción

“Queremos máis participación creando espazos de poder popular con medidas como os orzamentos participativos, pero tamén moita máis transparencia. Abriremos portas e fiestras. Queremos un concello coas paredes de cristal. Para erradicarmos dunha vez por todas o enchufismo e a corrupción. Merecemos un goberno no que ningún concelleiro estea imputado por facer negocio co cemento das obras municipais. Merecemos que Vigo deixe de figurar en causas xudiciais como a Operación Patos. Merecémolo e farémolo realidade”.

“O BNG – Asembleas Abertas temos as ideas, temos as propostas e temos a equipa para facer este cambio de rumbo unha realidade. Nós non partimos de cero. Incorporamos novas persoas e novas enerxías para continuar a excelente labor que o BNG xa veu desenvolvendo estes anos.

Di o noso lema que depende de nós, de todos e todas nós. Temos que decidir se queremos continuar con máis política de escaparate, o retorno da dereita ou un tempo novo. Un tempo novo porque votar ao BNG este domingo é un voto polo cambio, si ou si. Nin máis políticas inútiles nin máis recortes. Votar BNG-Asembleas Abertas é votar máis política de emprego e máis política social. É votar por un Vigo máis verde, sostíbel e en rede, no que recuperemos o noso litoral e impidamos a instalación dun macrocentro comercial no noso monte. Un Vigo que sexa motor de cambios para a nosa nación, para Galiza. Facelo posíbel depende de vós. Precisamos do voso apoio, do voso empuxe. Por iso, o 24 de maio hai que votar cambio, hai que votar BNG-Asembleas Abertas”.

Proxecto de país

O portavoz nacional, Xavier Vence, instou ao electorado indeciso a que non fique na casa, -“votar o 24M para no arrepentirse de resultados inesperados o 25”-, e argumento as razóns para coller a papeleta BNG-Asembleas Abertas. “Porque o teu voto ao BNG ten un dobre valor: é clave para derrotar ao PP e é clave para construír un proxecto nacionalista no conxunto do país”, explicou. Neste sentido subliñou que o Bloque “é a única alternativa nacionalista que lle disputa o terreo palmo a palmo ao PP desde os concellos”, porque Galiza constrúese desde os 314 cidades e vilas, “sen cantonalismos” e “sen improvisación de última hora”.

Reiterou o compromiso público do BNG de que todos os concellos baixo goberno nacionalista a partir do 24M “serán un contrapoder ás políticas devastadoras do centralismo e da dereita” concellos libres de desafiuzamento, de pobreza infantil e de pobreza enerxética, libres de corrupción e intolerantes contra a corrupción, e impulsores da lingua e da cultura do país..

Vence pediu o voto para as candidaturas nacionalistas co “aval” do traballo feito nos concellos nos que goberna, un “modelo de concellos BNG” quere estender por toda Galiza. “Votar BNG-Asembleas Abertas é votar por concellos democráticos e honestos, concellos nos que vivir e traballar, concellos dinámicos con oportunidades para a xente nova, concellos socias, públicos e orgullosos do noso”, argumentou.